Abai oblysynyń qurylatynyn estigen Semei halqy shat-shadyman kúide. Prezidenttiń osy sózderdi aitqan sátinde oryndarynan atyp turyp, bir-birin qushaqtap, quttyqtap jatqan turǵyndardyń beinejazbasy buǵan dálel.
Sondaǵy alǵashqy qatarda otyrǵan Qazaqstan Jazýshylar odaǵy Semei qalalyq filialynyń tóraǵasy Merei Qart jan saraiyn jadyratqan jańalyqty estigendegi alǵashqy áserin bólisti, dep habarlaidy QazAqparat tilshisi.
«Abai oblysynyń qurylýy bizge kútpegen tosynsyi boldy. Muqym qala jurtshylyǵy bórkimizdi aspanǵa atyp qýanyp jatyrmyz. Eń alǵash estigen sátte ózimdi qoiarǵa jer tappai, tóbem kókke jetti. Memleket basshysy Qasym Jomart-Toqaev byltyr Abaidyń 175 jyldyǵynda «Abai uldarymen» atty eskertkishtiń ashylý rásimine qatysqan bolatyn. Sonda Prezident óz sózinde Semeidiń tarihi, mádeni statýsy bolý kerektigin aitqan edi. Mine, búgin sonyń núktesi qoiylyp otyr», - dedi Merei Qart.
Onyń aitýynsha, Abai, Shákárim men Muhtardy dúniege ákelgen qasietti jerdiń osyǵan deiin ekonomikalyq-áleýmettik turǵyda jaǵdaiy nasharlap, halqynyń turmysy tómendep ketken.
«Semeilikter bul jańalyqty kópten kútti. Dese de igiliktiń erte-keshi joq. Endi qaitadan shaharǵa jan bitip, tirshiligi qyj-qyj qainaidy dep senemin. Áleýmettik nysandar jóndeýden ótip, mádeni ortalyqtar ashylyp, jurttyń jaǵdaiy túzelse deimiz. Basqa oblystarmen terezemiz teń bolyp, mol qarajat bólinse quba-qup. Kósheler, joldar jóndelip, qordalanǵan basqa da máseleler sheshimin tapca degen tilektemiz», - dedi Qazaqstan Jazýshylar odaǵy Semei qalalyq filialynyń tóraǵasy.
Óz sózinde ol Semeidiń Batys óńirleri sekildi munai emes, Qaraǵandy oblysy siiaqty kómir emes, adam kapitalyn shyǵaryp otyrǵanyn jetkizdi.
«Keibireýler Semeide bolashaq joq, sondyqtan basqa jaqqa kóshý kerek degendi aityp júrdi. Meniń olarǵa aitarym – kezinde Alash partiiasy bolmasa qazir elorda men Almatyda júrgen jastardyń bolashaǵy bolmaityn edi», - dedi Merei Qart.
