Qostanai oblysynda Qusmuryn kenti elektr stansasyndaǵy iri órtke bailanysty ýaqytsha jaryqsyz qaldy. Bul faktini oblystyq TJD baspasóz qyzmeti túsindirdi, dep habarlaidy QazAqparat.
22 jeltoqsan kúni saǵat 6:09-da Áýliekól aýdany Qusmuryn kentindegi shaǵyn stansadan órt shyqqan.
«Birneshe minýttan keiin órt sóndirýshiler oqiǵa ornyna kelip, ony sóndire bastady. Jedel shtab quryldy. Transformator maiy janǵan. Órt 70 sharshy metr aýmaqty qamtyp, jaqyn ornalasqan transformatorlarǵa qaýip keltirdi. Ony sóndirýge aitarlyq kush pen qurylym qajet boldy», - dedi TJD-dan.
Ony sóndirýge 6 tehnika qatysty. Órttiń shyǵý sebebi zertteýden keiin belgili bolady, dedi departamentten.
«Órtten eshkim zardap shekken joq. Órt 12:49-da aýyzdyqtaldy. Kentti jaryqpen qamtamasyz etý úshin Qarasý jáne Naýryzym aýdandaryndaǵy elektr taratý jelelilerine qosylyp, jartylai qalpyna keltirildi. Jaryqpen qamtý jumysy jalǵasyp jatyr», - dep túiindedi TJD-dan.
