Ulytaý oblysynda qazaq aitys óneriniń kórnekti ókili, Qazaqstannyń halyq jazýshysy Júrsin Ermannyń 75 jyldyq mereitoiy keń kólemde atalyp ótip jatyr. Mereitoi aiasynda aqynǵa jerlesteri atynan sý jańa avtokólik tabystaldy, dep habarlaidy ult.kz.

Saltanatty shara XXXIV respýblikalyq “Ulytaý úni” festivali aiasynda uiymdastyryldy. Mereitoiǵa orai respýblikalyq aqyndar aitysy ótip, elimizdiń ár óńirinen kelgen óner maitalmandary bas qosty.

Aitys barysynda Júrsin Ermanǵa erekshe qurmet kórsetildi. Ulytaýlyqtar men oblys ákimi Eset Baikenniń atynan mereitoi iesine jańa avtokóliktiń kilti tabystaldy.

Aita keteiik, mereitoilyq aitysqa Qazaqstannyń túkpir-túkpirinen 14 belgili sýyrypsalma aqyn qatysyp jatyr. Olar sahna tórinde sóz saiystyryp, kórermenge aitys óneriniń úzdik úlgilerin usynýda.

Aita keteiik, Aitys ónerin damytýǵa qosqan úlesi úshin Júrsin Ermanǵa "Halyq jazýshysy" ataǵy berildi.

Júrsin Erman kim?
 

Júrsin Moldashuly Erman – qazaqtyń belgili aqyny, jýrnalist, Qazaqstannyń halyq jazýshysy jáne qazirgi aitys óneriniń damýyna zor úles qosqan qoǵam qairatkeri. Ol 1951 jyly 12 aqpanda Ulytaý aýdanynda dúniege kelgen. 1976 jyly Qazaq memlekettik ýniversitetiniń jýrnalistika fakýltetin támamdaǵan. Eńbek jolyn Jezdi aýdandyq “Oktiabr týy” gazetinde ádebi qyzmetker bolyp bastaǵan.

Keiin Jezqazǵan oblystyq teleradiokomitetinde, Qazaq respýblikalyq televiziiasynda basshylyq qyzmetter atqardy. Sondai-aq “Qazaq ádebieti” gazeti men “Juldyz” jýrnalynda eńbek etti. Ár jyldary Qazaq radiosynyń bas direktory qyzmetin de atqarǵan.

Júrsin Erman qazaqtyń dástúrli aitys ónerin qaita jańǵyrtyp, onyń úlken sahnaǵa shyǵýyna erekshe eńbek sińirdi. 1984 jyldan bastap respýblikalyq aqyndar aitysyn uiymdastyryp, kóptegen jas talanttyń tanylýyna jol ashty. Onyń bastamasymen ótken aitystar halyq arasynda keńinen tanymal boldy.

Aqynnyń alǵashqy “Janartaý” atty óleńder jinaǵy 1983 jyly jaryq kórdi. Keiin “Araily kún, armysyń”, “Ulytaýǵa bardyń ba?..”, “Qudiretke júginý”, “Eki tizgin, bir shylbyr” jáne basqa da kitaptary basylyp shyqty. Onyń shyǵarmalarynda týǵan jerge súiispenshilik, adamgershilik, ulttyq rýh pen qoǵam máseleleri keńinen kórinis tapqan.

Júrsin Erman – Muqaǵali Maqataev atyndaǵy ádebi syilyqtyń iegeri. Sonymen qatar “Qurmet”, “Parasat” jáne “Otan” ordenderimen marapattalǵan. 2026 jyly aqyn 75 jasqa toldy. Búginde ol qazaq ádebieti men aitys óneriniń damýyna eleýli úles qosqan kórnekti tulǵalardyń biri sanalady.