Almatyda áskeri qyzmetkerlerge, kommýnaldyq qyzmetkerlerge jáne oiran zardaptaryn joiýǵa atsalysýshylarǵa kómektesý úshin eriktiler bastamalary men qaiyrymdylyq aktsiialary belsendi túrde júzege asýda, dep habarlaidy QazAqparat.
Almatydaǵy «Rahym» áleýmettik úii 10 kúnnen beri barlyq qyzmet jáne quqyq qorǵaý organdarynyń qyzmetkerlerine ystyq tamaq ázirlep, taratýda. Budan bólek, 6 qańtardan bastap kúnine 2 myńǵa jýyq adamǵa taǵam daiyndady. Bul týraly «Rahym» áleýmettik úii» qoǵamdyq qorynyń jetekshisi Bibinur Sheralieva aitty.
«Qala turǵyndary igi bastamany blogerler arqyly bilip, ony qoldap, barlyǵyn aýqymdy túrde uiymdastyrdy. Bul eń aldymen halyqtyń qýaty. Biz aktsiiany 6 qańtarda bastadyq. Sol kezde men buqtyrylǵan makaron pisirdim, ol 130 portsiia boldy. Blogerlerge plastikalyq ydystardy satyp alýǵa kómektesýleri úshin habarlastym. Jalpy, bul jumysty atqaryp júrgenime úsh jyl boldy. Qala qalpyna kelip jatqanda, bul bastamanyń aýqymdy aktsiiaǵa ainalýyn, kún saiyn ystyq tamaq berýimizdi qalaimyn. Biz qala turǵyndaryna da habarlasa bastadyq. Biz áleýmettik úide bir kúnde 2000 portsiia taǵam daiyndadyq. Úlken qazandar men azyq-túlikterdi aldyq. Turǵyndar da kómektese bastady. Mysaly, olar kartop, piiaz, sábizderdi úilerinde tazalady. Biz sondai-aq jinalǵan ortaq aqshaǵa siyr satyp aldyq. Jalpy, biz 6-nan beri jumys istep jatyrmyz, búgin týra 10 kún boldy. On kúnniń ishinde 12 myńnan astam portsiia taǵam daiyndadyq. Keshe biz 1680-in ázirledik», - dedi Bibinur Sheralieva.
Áleýmettik úidiń basshysy ystyq tamaq Ulttyq ulan, ishki eshelon áskerlerine, arnaiy jasaq, Bostandyq jáne Medeý aýdandyq ishki ister bóliminiń qyzmetkerleri, kommýnaldyq qyzmetkerlerge, eriktiler, sondai-aq, Almatyda qalǵan stýdentterge taratylyp jatqanyn aitty.
«Budan bólek, birlese tamaq jáne sýsynmen qamtamasyz etý úshin biz demeýshilerdi de tarttyq. Qalanyń qaiyrymdy azamattary men qala turǵyndaryna rahmet. Biz bastadyq, blogerler men halyq bizdiń bastamamyzdy qoldady. Bizdiń kúsh-qýatymyz birlikte jáne turǵyndar oǵan kómektesip jatyr», - deidi «Rahym» áleýmettik úii» qoǵamdyq qorynyń basshysy Bibinur Sheralieva.
Sondai-aq ol atalmysh aktsiia qala qalpyna kelgenshe jalǵasatynyn jetkizdi.
