Almaty oblysynda kúshikterdi órtedi degen kúdikpen ustalǵan eki oqýshy mundai jaýyzdyqqa ne sebepti barǵandaryn aitty, dep habarlaidy "Ult aqparat".
«2020 jyldyń 26 mamyrynda Almaty oblysy Alakól aýdany Qabanbai aýylynyń janynda Dáýren ekeýimiz itti qyzyq kórip órtedik. Sol qylyǵymyz úshin keshirim suraimyz», - dedi Didar Shalqaruly esimdi 10-synyp oqýshysy.
Al onyń janynda bolǵan Dáýren esimdi 9-synyp oqýshysy Didarǵa kómekshi bolǵany úshin halyqtan keshirim suraitynyn jetkizdi.
Kúshikti óltirdi degen kúdikpen ustalǵan Didar Shalqaruly Taldyqorǵan qalasy, Eńbek aýylyndaǵy meshittiń janynda ornalasqan jekemenshik qaiyrymdylyq mekemesiniń tárbielenýshisi eken. Ol osy mekemede turady jáne orta bilim beretin mekteptiń keshki aýysymynda oqidy. Biraq, koronavirýs indetine bailanysty qazir nysan jabyq tur.
«Didar Shalqaruly qaiyrymdylyq mekemesinde turady. Ol byltyr qyrkúiek aiynda osynda qabyldanǵan bolatyn. Bul jerde belgili ýaqyttarda ádebiet baǵytynda oqytamyz, jyr-dastan jattatamyz. Balalar ońdy-soldy áreketterge ketpes úshin odan bólek, dini saýattaryn ashamyz. Al tereńdetip, bir baǵytta dini uiymǵa kirgizý maqsatynda eshqandai bala daiyndamaimyz. Ol baǵytta tálim-tárbie bermeimiz», - deidi «Taldyqorǵan» jeke qaiyrymdylyq mekemesiniń resmi ókili Erlan Berdibekov.
Málim etilgendei, bul jerge áleýmettik jaǵdaiy tómen otbasylardyń balalary ǵana qabyldanady. Qyrkúiek aiynda ashylǵan mekemeniń qazir 20 tárbielenýshisi bar. Mekeme ókilderi Didar Shalqarulynyń kúshikti tiridei órtegenin estip, jaǵalaryn ustap otyrǵandaryn aitady.
Tirshilik iesin aiýandyqpen óltirgen 15 jáne 16 jastaǵy balalardyń ústinen qazir qylmystyq is qozǵalyp, tergeý júrip jatyr.
D. Shalqarulynyń qasynda bolǵan Dáýren esimdi bala bir úidiń jalǵyzy eken.
Esterińizge sala keteiik, qylmys Almaty oblysy Alakól aýdanynyń Qabanbai aýylynda boldy. Eki bala qapqa salynǵan kúshiktiń ústine benzin quiyp, tiridei órtep jibergen. Bul isterin videoǵa túsirip, áleýmettik jelige jariialaǵan.
Jedel-izdestirý sharalary barysynda kúdikti retinde eki jasóspirim ustaldy.
