QR Qarjy ministrligi qurylys salasynda memlekettik satyp alýlarǵa qatysýdy jeńildetý maqsatynda zańnamaǵa túzetýler engizýdi josparlap otyr. Bul týraly Májilistegi Úkimet saǵatynda málim boldy, dep habarlaidy "Ult aqparat" QazAqparat agenttigine silteme jasap.
Qarjy ministri Baqyt Sultanovtyń sózine qaraǵanda, laýazymdy tulǵalardyń jaýapkershiligin kúsheitý maqsatynda aýditorlyq sharalardy júrgizý kezinde sybailas jemqorlyqqa qarsy standattar qabyldandy jáne memlekettik aýdit salasynda atalǵan zań buzýshylyqtardy tómendetý boiynsha sharalar jospary bekitildi.
Osy oraida tekserýler qorytyndysy boiynsha laýazymdy tulǵalarǵa qatysty tiisti sharalar qoldanylatynyna toqtalǵan ministr, «tek 2016-2017 jyldary 15 basshy qyzmettik sáikessizdigi ári sógis pen eskertý túrindegi jaýapkershilikpen jazalandy», - dedi.
Vedomstvo basshysynyń atap ótýinshe, quqyq qoldaný tájiribesi boiynsha sybailas jemqorlyq kórinisteri kóbinese qurylys salasyndaǵy memlekettik satyp alýlarda baiqalady. Bul baǵytta ótinimderdiń úilespeý sebepteri negizinen jobalaý-smetalyq qujatnamasymen bailanysty bolyp otyr.
«Máselen, konkýrstyq qujatnamalar boiynsha úlken kólemdegi rastaityn qujattardy usynýdy qajet etedi jáne eskirgen tehnikany qamtyǵan. Osyǵan bailanysty sybailas jemqorlyq táýekelderin azaitý maqsatynda ministrlik qurylys salasynda satyp alýlar boiynsha áleýetti jetkizýshilerge talaptardy jeńildetý turǵysynda tiisti jumystardy bastap ketti. Sáikes túzetýler zań jobasyna engizildi. Jaqyn arada ony Sizderdiń talqylaýlaryńyzǵa usynbaqpyz», - dedi ministr.
«Jalpy, usynylyp otyrǵan túzetýler aiasynda qurylystaǵy memlekettik satyp alýlar barysyndaǵy tapsyrys berýshiler men memlekettik aýdit organdary tarapynan sybailas jemqorlyq táýekelderi tómendeidi dep paiymdap otyrmyz», - dep túiindedi sózin ol.
