Tarbaǵatai aýdanynda sút ónimderin naryqqa shyǵaryp, sharýasyn dóńgeletip otyrǵan adamdardyń qatary kóbeigen. Solardyń biri - «Jańalyq» aýylynyń turǵyny Shynar Ospanova.
Shynardyń jubaiy Dáýlet Abylaev osydan birer jyl buryn «Dáýletbai» shaǵyn sharýashylyǵyn quryp, et baǵytyndaǵy iri qara ósirip kelgen bolatyn. Ótken jyly kúzde erli-zaiyptylar aqyldasa kelip, saýyn malyn baǵýdy da jón kórgen. «Jumyspen qamtýdyń jol kartasy-2020» baǵdarlamasy aiasynda Shynar jeke kásipker bolyp tirkelip, 3 mln. teńgege jeńildetilgen nesie aldy. Oǵan Kókpekti aýdanynan simmental tuqymdy segiz siyr men bir buqany satyp alyp keldi. Siyrlary biylǵy kóktemde buzaýlady. Kúnine 8-10 litrden sút berip, durys sheshim qabyldaǵandaryna kóz jetkizdi. Kúndelikti 40-50 litr ónimdi aýyldan segiz shaqyrym jerdegi Aqjardaǵy sút tsehyna ótkizip, óniminiń paidasyn kóre bastady.
Shynardyń aitýyna qaraǵanda, siyrlary aýyldyń tabiǵatyna jyldam beiimdelgen, kúi talǵamaidy, qysy-jazy saýylady. Jeke kásipker óziniń ónimderinen mai shaiqap, airan uiytyp, qurt, irimshik jasap, Aqjardaǵy bazarlarda saýdalaidy. Ónimderi sapaly bolǵandyqtan tez ótedi. Muny alys-jaqyndaǵylar da ańǵara bastaǵan. Jaqynda ǵana Astana qalasynyń «Qoiandy» móltek aýdanynyń iri saýda dúkeniniń ákimshiligi Shynardyń qurty men irimshigine tapsyrys beripti. Tapsyrystyń údesinen shyǵý lázim. Qoiylar talap ta joǵary. Sondyqtan kásipker úsh tońazytqysh satyp alyp, úi ishinen shaǵyn qoima ashty.
Aldaǵy kóktemde taǵy bes saýyn siyr satyp almaq. Oǵan barlyq múmkinshilik jetip jatyr. Sharýashylyqtarynda 500 ga jaiylym, 20 ga jońyshqa alqaby bar. Qazirdiń ózinde 50-60 tonna mal azyǵy daiyndaldy.
Biyl «Jańalyq» aýylynyń Shynar siiaqty taǵy eki azamatshasy saýyn siyr alýǵa niettenip, nesie alýǵa ótinish bergen. Bul da Shynardyń alǵan baǵytynyń durys ekenin kórsetse kerek.
Qadyrbek Kákimuly
Tarbaǵatai aýdany.
