تارباعاتاي اۋدانىندا سٷت ٶنٸمدەرٸن نارىققا شىعارىپ, شارۋاسىن دٶڭگەلەتٸپ وتىرعان ادامداردىڭ قاتارى كٶبەيگەن. سولاردىڭ بٸرٸ - «جاڭالىق» اۋىلىنىڭ تۇرعىنى شىنار وسپانوۆا.
شىناردىڭ جۇبايى دەۋلەت ابىلاەۆ وسىدان بٸرەر جىل بۇرىن «دەۋلەتباي» شاعىن شارۋاشىلىعىن قۇرىپ, ەت باعىتىنداعى ٸرٸ قارا ٶسٸرٸپ كەلگەن بولاتىن. ٶتكەن جىلى كٷزدە ەرلٸ-زايىپتىلار اقىلداسا كەلٸپ, ساۋىن مالىن باعۋدى دا جٶن كٶرگەن. «جۇمىسپەن قامتۋدىڭ جول كارتاسى-2020» باعدارلاماسى اياسىندا شىنار جەكە كەسٸپكەر بولىپ تٸركەلٸپ, 3 ملن. تەڭگەگە جەڭٸلدەتٸلگەن نەسيە الدى. وعان كٶكپەكتٸ اۋدانىنان سيممەنتال تۇقىمدى سەگٸز سيىر مەن بٸر بۇقانى ساتىپ الىپ كەلدٸ. سيىرلارى بيىلعى كٶكتەمدە بۇزاۋلادى. كٷنٸنە 8-10 ليتردەن سٷت بەرٸپ, دۇرىس شەشٸم قابىلداعاندارىنا كٶز جەتكٸزدٸ. كٷندەلٸكتٸ 40-50 ليتر ٶنٸمدٸ اۋىلدان سەگٸز شاقىرىم جەردەگٸ اقجارداعى سٷت تسەحىنا ٶتكٸزٸپ, ٶنٸمٸنٸڭ پايداسىن كٶرە باستادى.
شىناردىڭ ايتۋىنا قاراعاندا, سيىرلارى اۋىلدىڭ تابيعاتىنا جىلدام بەيٸمدەلگەن, كٷي تالعامايدى, قىسى-جازى ساۋىلادى. جەكە كەسٸپكەر ٶزٸنٸڭ ٶنٸمدەرٸنەن ماي شايقاپ, ايران ۇيىتىپ, قۇرت, ٸرٸمشٸك جاساپ, اقجارداعى بازارلاردا ساۋدالايدى. ٶنٸمدەرٸ ساپالى بولعاندىقتان تەز ٶتەدٸ. مۇنى الىس-جاقىنداعىلار دا اڭعارا باستاعان. جاقىندا عانا استانا قالاسىنىڭ «قوياندى» مٶلتەك اۋدانىنىڭ ٸرٸ ساۋدا دٷكەنٸنٸڭ ەكٸمشٸلٸگٸ شىناردىڭ قۇرتى مەن ٸرٸمشٸگٸنە تاپسىرىس بەرٸپتٸ. تاپسىرىستىڭ ٷدەسٸنەن شىعۋ لەزٸم. قويىلار تالاپ تا جوعارى. سوندىقتان كەسٸپكەر ٷش توڭازىتقىش ساتىپ الىپ, ٷي ٸشٸنەن شاعىن قويما اشتى.
الداعى كٶكتەمدە تاعى بەس ساۋىن سيىر ساتىپ الماق. وعان بارلىق مٷمكٸنشٸلٸك جەتٸپ جاتىر. شارۋاشىلىقتارىندا 500 گا جايىلىم, 20 گا جوڭىشقا القابى بار. قازٸردٸڭ ٶزٸندە 50-60 توننا مال ازىعى دايىندالدى.
بيىل «جاڭالىق» اۋىلىنىڭ شىنار سيياقتى تاعى ەكٸ ازاماتشاسى ساۋىن سيىر الۋعا نيەتتەنٸپ, نەسيە الۋعا ٶتٸنٸش بەرگەن. بۇل دا شىناردىڭ العان باعىتىنىڭ دۇرىس ەكەنٸن كٶرسەتسە كەرەك.
قادىربەك كەكٸمۇلى
تارباعاتاي اۋدانى.
