Foto: Instagram/daulet_mukayev
Bloger, IT-aǵartýshy Timýr Bektur biyl "Qurmet" ordenin alǵan Qyran Talapbek týraly oi tolǵady. Aitýynsha, tanymal mobilograf bul kórsetilgen qurmetke ábden laiyq. Sózbe-sóz:
"Qyran degen jas bala bar. Sol jigit biyl “Qurmet” ordenin alǵanda qatty qýandym. Jelidegi halyq jeldei esip ósektep ketse de, oǵan kórsetilgen “Qurmet” qurmetti degen oidamyn.
Nelikten?
Óitkeni, bizdiń biliktegiler qazynany toltyrýdyń jalǵyz joly - alym-salyqtyń neshe túrin oilap taýyp, jańadan aiyppuldar shyǵaryp, kásip jasaýdyń halyqtyq túrlerine qoldarynan kelgenshe tosqaýyl qoiyp jatqanda, bul shynashaqtai bala jalǵyz ózi júrip Qazaqstanda mobilografiia dep atalatyn jańa bir kásip jolyn ashty.
On myńdaǵan órendei jastardy oqytyp, júz myńdaǵan kásipkerge tyńnan tynys ashty.
Oilap qarańyzshy? Eshkimdi kóshege bastap shyqpai, eshkimge jylamai, eshkimnen eshteńe suramai-aq, ár mobilograftyń ailyq jalaqysy - 200.000 teńge dep eseptegende, 10.000 mobilograf 2 mlrd teńge ekonomikalyq ainalym jasaidy.
Al endi oilap qarańyz, elimizdegi árbir adam osy jigit siiaqty aiaq astynan ekonomikanyń jańa bir sektoryn jasap jatyr ma? Joq! Osydan keiin ol “Qurmetti” bolmaǵanda, kim “Qurmetti” bolmaq?
Bul jerde meniń Qyranǵa qatty qyzyǵatyn taǵy bir tusym - jańa ekonomika, didjital transformatsiia, IT salasy dep men sońǵy 10 jylda aitpaǵan tesigim, jazbaǵan jerim qalmasa da ne áleýmettik jelide, ne shynaiy ómirde osyndai alapat qozǵalys jasai almai-aq qoidym. Men túgil elimizdiń tutas ýniversitetteri, neshe túrli IT kompaniialar men respýblika aimaǵyndaǵy barlyq IT-habtar ondai qozǵalys jasai almai otyr.
Taǵy da bir qyzyǵatynym: mobilografiia - didjital marketiń men zamanaýi PR sharasyndaǵy bir túiir baǵyt. Sonyń ózinen qansha jumys ornyn, Qazaqstannyń servis boiynsha jalpy ishki ónimin qalyptastyrýǵa bolady. Al didjital media, kreativ indýstriia men IT baǵytynda mundai myńdaǵan baǵyt sol kúii qozǵalmastan jatyr.
Biz ózi ainaldyrǵan 20-aq million halyqpyz. Bul 20-aq million halyqtyń árqaisysyna 20 jumystan, aiyna 20 mln tabatyn ekonomika qalyptastyrýǵa bolady. Kedeilikti túbirimen, jumyssyzdyqty tuqymymen joiýǵa bolady.
Biraq nege ekenin bilmeimin… Sony istei almai otyrmyz.
Osyǵan ishim ashidy".
