«Barys» búgin Qurlyqtyq hokkei ligasyndaǵy kezekti oiynyn Reseide «Neftehimik» (Nijnekamsk) komandasyna qarsy ótkizdi, dep habarlaidy QazAqparat.
Eki komanda búginge deiin 28 márte sheberlik baiqasty. Onyń 16-y «Barystyń» basymdyǵymen aiaqtalsa, qalǵanynda reseilik klýbtyń mereii ústem boldy.
Eki komanda arasyndaǵy sońǵy alty kezdesýdiń beseýinde qazaqstandyq klýb jeńiske jetti.
Kezdesý barysynda komandalar bastapqy ýaqyttan shabýylǵa kóbirek kóńil bóldi. Dese de keibir sátterde óz múmkindigin paidalana alǵan joq. Birinshi kezeńde tablodaǵy esep ózgerissiz qaldy.
Ekinshi kezeńde «Neftehimik» sapynan Sergei Kýptsov 30, Pavel Poriadin 33-minýttarda mergendik tanytty. Oǵan 39-minýtta qazaqstandyq klýbtan Roman Starchenko bir golmen jaýap qaiyrdy.
Úshinshi kezeńde «Barys» sapynan Kirill Savitskii 47-minýtta tarazy basyn teńestirse, Kiortis Valk 52-minýtta elordalyq komandany alǵa shyǵardy. Al 59-minýtta elordalyq klýbtan Tomash Iýrcho qorytyndy esepti belgiledi.
Osylaisha «Barys» qarsylasynan 4:2 esebimen basym tústi.
Endi «Barys» 6 jeltoqsanda Reseide «Ak Bars» (Qazan) komandasymen kezdesedi.
