Búgin astanalyq «Barys» Qurlyqtyq hokkei ligasyndaǵy kezekti oiynyn elordada Qytaidyń «Kýnlýn Red Star» komandasyna qarsy ótkizdi, dep habarlaidy QazAqparat.
Kezdesýde alǵashqy minýttarda qytailyq hokkeishiler sátti oiyn ótkizdi. Nátijesinde olardyń qatarynan Aleks Rich 17, Jýdi In 22, Mihael Tam 25-minýttarda mergendik tanytty.
Odan keiingi kezekte «Barys» sapynan Egor Petýhov 28, Roman Starchenko 31, Linden Vei 33-minýttarda gol soǵyp, tarazy basyn teńestirdi. Al Iakob Lilia 38, 44-minýttarda eki goldyń avtory atanyp, elordalyq klýbty alǵa shyǵardy.
Budan keiin qytailyq komandadan Itan Veren 48-minýtta esep aiyrmasyn qysqartqan edi. «Barys» hokkeishileri Kodi kýnik 49, Mett Frettin 51-minýttarda kózdegen nysanadan múlt ketken joq.
Elordalyq klýb qarsylasynan 7:4 esebimen basym tústi. Osylaisha qatarynan tórt márte jeńiske jetti.
Qazir «Barys» 37 oiynnan keiin 36 upaimen týrnir kestesinde 18-orynnan 16-orynǵa kóterildi.
«Barys» endi kelesi oiynyn 12 jeltoqsanda elordada Reseidiń «Neftehimik» (Nijnekamsk) komandasyna qarsy ótkizedi.
