«Barys» búgin Qurlyqtyq hokkei ligasyndaǵy kezekti oiynyn Reseide «Ak Bars» (Qazan) komandasyna qarsy ótkizdi, dep habarlaidy QazAqparat.
Kezdesý barysynda qazaqstandyq hokkeishiler senimdi bastady. Dese de birinshi kezeńde esep ashylǵan joq.
Ekinshi kezeńde 21-minýtta Iakob Lilia kózdegen nysanadan múlt ketpei, «Barys» komandasyn alǵa shyǵardy. Reseilik klýb budan keiin tarazy basyn teńestirýge umtylǵan edi. Soǵan qaramastan tablodaǵy esep ózgerissiz qaldy.
Úshinshi kezeńde «Barys» basymdyǵyn arttyra tústi. Qazaqstandyq klýb sapynan Arkadii Shestakov 50-minýtta qarsylastar qaqpashysyn qapy qaldyryp ketti. Oiynnyń 58-minýtynda «Ak Bars» sapynan Dmitrii Voronkov esep aiyrmasyn qysqartty.
Kezdesýde «Barys» qarsylasynan 2:1 esebimen basym tústi.
Endi «Barys» 9 jeltoqsanda elordada Reseidiń «Sochi» komandasyn qabyldaidy.
Aita keterligi, eki komanda arasyndaǵy sońǵy tórt kezdesýde qazaqstandyq klýb atalǵan qarsylasyna ese jiberip qoiǵan edi.
