Óńirde áleýmettik mańyzy bar azyq-túlik taýarlaryna negizsiz joǵary baǵa belgilegen kásipkerler anyqtaldy, dep habarlaidy ult.kz.
Qaraǵandy oblysynda azyq-túlik baǵasyn qalyptastyrý kezinde birqatar zań buzýshylyq anyqtaldy. Tekserý barysynda keibir kásipkerlerdiń áleýmettik mańyzy bar taýarlarǵa belgilengen shekti saýda ústemesin birneshe ese asyryp jibergeni belgili boldy.
Máselen, Qaraǵandydaǵy dúkenderdiń birinde kelisi 205 teńgeden satyp alynǵan kúrish 556 teńgeden satylǵan. Osylaisha, taýarǵa 160%-dyq saýda ústemesi qosylǵan. Kásipker ákimshilik jaýapkershilikke tartylyp, kúrishtiń baǵasy 235 teńgege deiin tómendetildi.
Taǵy bir jaǵdaida qatty irimshiktiń satyp alý baǵasy 3 353 teńge bolǵanymen, ol saýda jelisine 5 517 teńgeden jetkizilgen. Saýda ústemesi 64%-dy quraǵan. Tekserýden keiin ónimniń baǵasy 3 855 teńgege deiin túsirilip, 1 662 teńgege arzandady.
Qara shaidyń baǵasynan da zań buzýshylyq anyqtalǵan. Kásipker 472 teńgege satyp alǵan ónimin 1 079 teńgeden satqan. Iaǵni saýda ústemesi 130%-ǵa jetken. Ákimshilik shara qoldanylǵannan keiin shaidyń baǵasy 496 teńgege deiin tómendetildi.
Al taýyq farshy 1 655 teńgege satyp alynyp, 2 400 teńgeden satylǵan. Tekserý nátijesinde onyń baǵasy 1 903 teńgege deiin túsirildi.
Jyl basynan beri Qaraǵandy oblysynda saýda salasyndaǵy zańnamanyń saqtalýyna qatysty 170 kásipkerlik sýbektisi tekserilgen. Onyń 155-i ákimshilik jaýapkershilikke tartyldy. Salynǵan aiyppuldardyń jalpy somasy 4 mln teńgeden asty.
Jaýapqa tartylǵandardyń arasynda saýda bazarlaryndaǵy 44 kóterme jetkizýshi men 11 kóterme-bólshek saýda dúkeni bar. Bul kórsetkish ótken jyldyń sáikes kezeńimen salystyrǵanda 39,6%-ǵa kóp. 2025 jyly osy ýaqytta 111 kásipker ákimshilik jaýapkershilikke tartylǵan.
Tekserý kezinde tek azyq-túlikke belgilenetin saýda ústemesi ǵana emes, baqylaý-kassa mashinalaryn paidalaný, baǵa belgileriniń bolýy, ónimderdi tańbalaý jáne ótkizý talaptary da qaralǵan.
Departament málimetinshe, anyqtalǵan zań buzýshylyqtardyń barlyǵy joiylyp, taýar baǵalary tómendetilgen.
Qaraǵandy oblysynda áleýmettik mańyzy bar azyq-túlik baǵasyna monitoring júrgizý, negizsiz deldaldyq býyndardy anyqtaý jáne baǵanyń negizsiz ósýine jol bermeý jumystary jalǵasyp jatyr.
