Senat depýtaty Aqylbek Kúrishbaev Palatanyń jalpy otyrysynda ósimdikter karantini boiynsha otandyq zerthanalardyń jumysy syn kótermeitinin aitty, dep habarlaidy "Ult aqparat".
Ol óz sózinde jaqynda qaýipti virýs tabyldy degen sebeppen qazaqstandyq tomat pen burysh ónimderin Reseige kirgizýge tyiym salynǵanyna nazar aýdaryp, buǵan zerthanalardyń atalǵan baǵyttaǵy mardymsyz jumysy da sebep bolǵanyn jetkizdi.
«Mundai saýda soǵysynda taýardyń sapasyn ǵylymi turǵydan rastaý basty dálel bolyp sanalady. Al bizdiń zerthanalyq bazamyzdyń jaǵdaiy eshqandai syn kótermeidi. On jyl boiy biz ósimdikter karantini boiynsha zerthanany jóndi uiymdastyra almai kelemiz. Ne zamanaýi baza, ne zertteýdiń qazirgi ádisterin meńgergen kásibi mamandar joq», - dedi A. Kúrishbaev.
Osy rette depýtat bul jumysqa jaýapty laýazymdy tulǵalarǵa óz keńesin berdi.
«Máskeýge baryp, Búkilreseilik ósimdikter karantini ǵylymi-zertteý institýtynyń qalai jumys isteitinin kórseńizder, bizdiń qanshalyqty artta qalǵanymyzdy túsiner edińizder», – dedi senator.
Depýtattyń aitýynsha, elimizde gendik modifikatsiialanǵan organizmder (GMO) ónimderin zertteý júiesindegi jaǵdai da osyndai. Sondyqtan Qazaqstanǵa gendik modifikatsiialanǵan tamaq ónimderiniń jáne tuqymdyq materialynyń kirý qaýpi óte joǵary.
«Bul máselelerdiń ekonomikamyz jáne azamattarymyzdyń densaýlyǵy úshin asa mańyzdy ekenin eskerip, saraptamalyq qyzmet kórsetetin barlyq zerthanalarǵa reviziia júrgizgen jón dep esepteimin. Sondai-aq, olardy zamanaýi deńgeide kadrlyq, tehnikalyq jáne ádistemelik turǵydan qamtamasyz etip, elimizdegi saraptama júrgizetin mekemelerdi jańǵyrtýǵa qatysty tiisti sharalar qabyldaý qajet dep sanaimyn», – dedi Senat depýtaty Aqylbek Kúrishbaev.
