Búgin Senattaǵy Qazaqstannyń agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasyn iske asyrý taqyrybyndaǵy Úkimet saǵatynda depýtat Aqylbek Kúrishbaev áleýmettik mańyzdaǵy taýarlar tizimin keńeitýdi usyndy, dep habarlaidy "Ult aqparat".
«Qoǵamdaǵy eń ózekti másele – ol azyq-túliktiń qymbattaýy.
Esep komitetiniń qorytyndysyna sáikes, bizde azyq-túlik qaýipsizdiginiń kórsetkishteri durys anyqtalmaidy eken. Olardy esepteý úshin tamaq ónimderin tutynýdyń tiisti fiziologiialyq normalary qoldanylmaidy. Sondai-aq halyqtyń azyq-túlikpen qamtamasyz etilýin anyqtaý ádistemeleri Úkimettiń normativtik-quqyqtyq aktilerimen bektilmegen. Bul turǵyda Aýyl sharýashylyǵy ministrligi ne istep jatyr? Ekinshi suraqqa toqtalsam, memleket retteitin áleýmettik mańyzy bar azyq-túlik ónimderiniń tizimine Reseide 24 túri, Belarýs Respýblikasynda – 28 túri engen. Al Qazaqstanda bar bolǵany - 19, bizde bul tizimde ettiń, kókónistiń, jarmanyń keibir túrleri joq. Al jemis-jidek pen balalar taǵamy tipti enbegen. Bizdiń oiymyzsha, bul - durys emes! Bizdiń halqymyz azyq-túliktiń tek 19 túrin tutynbaidy. Osyǵan orai, elimizde baǵasyn memleket retteýi tiis áleýmettik mańyzy bar azyq-túlik taýarlarynyń tizbesin keńeitý týraly pikirlerińiz qalai?», - dep surady senator Aqylbek Kúrishbaev.
Óz kezeginde Aýyl sharýashylyǵy ministri Saparhan Omarov biyl Esep komiteti vedomstvony teksergen kezde fiziologiialyq normalardy retteitin qaǵidanyń joq ekenine nazar aýdarǵanyn atap ótti.
«Biz onymen kelisemiz. Bul qaǵida bolǵan, biraq ministrliktiń óziniń ishinara buiryǵymen bekitilgen. Sondyqtan qazir Esep komitetiniń bergen usynysyn eskere otyryp, osy qaǵida daiyndaldy. Qazir qaǵida memlekettik organdarmen kelisilip jatyr. Osy aidyń ishinde ol bekitilýi kerek. Ekinshi suraqqa keletin bolsam, búginde Qazaqstanda áleýmettik mańyzdaǵy taýarlardyń ishinde 19 azyq-túliktiń túri engizilgen. Biraq ministrlik retinde baǵa boiynsha, ónimmen qamtamasyz etilýi deńgeiin ózimiz 29 azyq-túlik túri boiynsha júrgizip kelemiz, iaǵni mańyzdy ónimder qamtylǵan. Al Resei men Belarýste bizge tán emes biraz azyq túri bar. Mysaly, olardyń tiziminde shoshqa eti, keptirilgen balyq siiaqty ónim bar. Belarýste kókónister eskirmegen», - dedi ministr.
Sonymen qatar Omarov senator Aqylbek Kúrishbaevtyń usynysyn qoldaitynyn aita kele, atalǵan másele boiynsha memlekettik organdarmen birlese tiisti talqylaý júrgizý kerek ekenin jetkizdi.
