Qazaqstan Respýblikasy Premer-Ministriniń birinshi orynbasary A. Mamin Almaty oblysyndaǵy saparyn «Qorǵas» HShYO nysandarynda jalǵastyrdy, dep habarlaidy "Ult aqparat" Almaty oblysy ákimdiginiń resmi saityna silteme jasap.
Ortalyqtaǵy Baqylaý-ótkizý pýnktinde keden jáne shekara qyzmetiniń ókilderi kedendik baqylaý men tólqujattyq tekserýden ótý protsedýralary jaily baiandady. Ortalyqta josparlanǵan 91 infraqurylym nysandarynyń búgingi kúnge 74-iniń qurylysy aiaqtalyp, 4-eýi bitýge taiaý. Terminal aimaǵy men «Samuryq» ortalyq alańyndaǵy eki saýda úiiniń qurylysy aiaqtalǵan. 2017 jyly ortalyq alań, qolónershiler qalasy, biznes-ortalyq, kópfýnktsionaldy ǵimarat pen saýda ortalyǵyn salyp bitirý kózdelgen. Búgingi kúni «Qorǵas» HShYO-ǵa kúnine 1700-2700 adam shamasynda keledi.
Sondai-aq birinshi vitse-premer bastaǵan resmi delegatsiia «QTJ» UK» AQ jataqhanasy men «Nurkent» kentindegi jergilikti atqarýshy organnyń eki turǵyn úiiniń qurylysymen tanysty. Oblystyq qurylys basqarmasynyń basshysy T. Bektasovtyń aitýynsha, eki turǵyn úi qurylysynyń jalpy quny 870,2 mln.teńge. Oǵan 2015 jyly jergilikti biýdjetten 100 mln.teńge bólinip, igerilgen. Al biylǵy jyly 759,332 mln.teńge qarastyrylyp, qurylysty aiaqtaý mejelenip otyr. Qurylys jumystaryn «Newconstruction» JShS júrgizýde.
Al «QTJ» jataqhanasynyń salyný barysy týraly «KazSMU» JShS direktory Kenjebai Japarov aityp berdi. Shaǵyn otbasylarǵa arnalǵan 60 páterli kommýnaldyq úilerdiń qurylysy tolyq aiaqtalyp, qazir ishki árleý, syrtqy abattandyrý jumystary jasalyp jatyr. «KazSMU» JShS ózderiniń satý-satyp alý týraly Kelisimsharttar jasasýǵa daiyn ekendikterin aitty.
Sapar barysynda A. Mamin «Batys Eýropa – Batys Qytai» avtokólik joly ýchaskesinde bolyp, onda atalǵan avtojoldyń qurylysymen jáne «Qorǵas» HShYO aýmaǵyndaǵy Qorǵas ózeniniń sý bógeti qurylysynyń júrgizilý barysymen tanysty.
«Batys Eýropa – Batys Qytai» avtokólik jolynyń Almaty oblysy aýmaǵyn basyp ótetin uzyndyǵy 460,5 shaqyrymdy quraidy. Mundaǵy qurylys 2013 jyldyń qazan aiynda bastalǵan. Jumystar 304 shaqyrymdyq 8 ýchaskede júrip jatyr, oǵan 4 merdiger kompaniia tartylǵan. Avtokólik joly 4 jolaqty qozǵalysqa, qozǵalys jyldamdyǵy 120 sh/saǵ. eseptelgen, bólý jolaǵynyń eni 5 m., jol tsement beton jabyndy bolady dep josparlanǵan. «Almaty - Qorǵas» avtokólik jolynyń ýchaskeleri oblystyń Ile, Talǵar, Eńbekshiqazaq, Uiǵyr, Panfilov aýdandaryn basyp ótip, «Almaty - Óskemen» avtojolynyń 24 shaqyrymynan Almaty qalasyn ainalyp, «Jetigen - Qorǵas» temir jolymen bir dálizde Qytai shekarasyna shyǵady.
Qorǵas ózenindegi bóget qurylysy barysymen «Qazseldenqorǵaý» MM basshysy Toqtarbek Baimoldaev baiandady. T. Baimoldaevtyń aitýynsha, Qorǵas-1 jobasyn júzege asyrý sheńberinde 2016 jyly Oijailaý salasyna aparatyn eksplýatatsiialyq-traktorlyq joldardyń qurylysy jasalýda. Selden qorǵaityn Shúkirbulaq bógetiniń qurylysyn bastaý úshin onyń qurylysynyń jobasy qazir Qazaqstan men Qytai memlekettik organdarynda kelisimnen ótkizilýde. Qorǵas ózeninde shuǵyl selden qorǵaý sharalaryn atqarý úshin 700,8 mln. teńge bólindi. Búginge deiin jer qazý, damb turǵyzý, sebý jumystary atqaryldy. Qorǵas-1 jobasyn júzege asyrý men Qorǵas – 2 jobasynyń 1-shi kezeńiniń jobalyq-smetalyq qujattamasyn ázirleýge 90 mln. teńge bólingen. Konkýrs nátijesi boiynsha «Jilstroi-2004» JShS jeńimpaz dep tanylǵan.
Sapar qorytyndysynda Úkimet basshysynyń birinshi orynbasary A. Mamin men oblys ákimi A. Batalov Qurǵaq port aimaǵynda bolyp, ondaǵy alǵashqy kásiporynnyń biri dándi daqyldardy qabyldaý, keptirý, saqtaý nysanynyń qazyǵyn qaqty.
Aita keteiik, bul nysannyń jobalyq quny 675 mln. teńge, 48 adamǵa jumys beredi. Kásiporyn bir mezgilde 15 myń tonna ónim saqtap, 2-shi jelisi keńeitilgen kezinde saqtaý kólemi 30 myń tonnaǵa jetkizilmek.
