Shekara túbindegi Erkin ekonomikalyq aimaqtyń qurylysyn tolyq aiaqtaý taiaýdaǵy eki-úsh jyldyń ishinde júzege aspaq. Bul jerde 30 myń adamdy jumyspen qamtý kózdelgen. Keleshekte dál osy jerden 100 myń turǵyny bar shyraily qalanyń irgetasy qalanady. Bul týraly Mádeniet jáne sport ministri Arystanbek MUHAMEDIULYNYŃ Almaty oblysyna jasaǵan issapary barysynda aityldy. Shekara shebindegi aýdanǵa at basyn burǵan qurmetti qonaqtardy oblys ákiminiń orynbasary Aidarbek Baijanov «Qorǵas» shekara mańy yntymaqtastyǵynyń halyqaralyq ortalyǵyna alyp bardy.
Delegatsiia aldymen ortalyqtyń birinshi baqylaý-ótkizý pýnktine keldi. Munda «Qorǵas – Shyǵys qaqpasy» erkin ekonomikalyq aimaǵy partiia komitetiniń múshesi, ortalyqtyń Qytai bóligi basshysynyń orynbasary Gýo Tszianbin qazaqstandyq qonaqtardy úlken qurmetpen qarsy aldy. Gýo myrza ekijaqty kezdesý barysynda Qazaqstan men Qytai eli arasyndaǵy tarihi, mádeni bailanysty erekshe atap ótip, búgingi tańdaǵy birlesken jobalardyń strategiialyq mańyzdylyǵyna, dostyq pen áriptestikti nyǵaitatyn mańyzdy kelisimderge toqtaldy. Qytai tarapynyń ókili, ásirese, Qazaqstan men Qytaidyń tranzittik áleýetin, ekonomikasyn kóteretin ekijaqty yntymaqtastyqtyń bolashaqta ózge de memlekettermen áriptestik ornatýǵa keńinen jol ashatynyn jetkizdi.
Sapar aiasynda ministr otandyq investorlarmen kezdesip, «Samuryq» ortalyq alańynda boldy. Jańa ortalyqta qazaqstandyq jáne álemdik eń tanymal ónimder tanystyryldy. Kórmege sharap, temeki, opa-dalap ónimderi men túrli táttiler qoiyldy. «Qorǵas» ShYHO» AQ prezidenti Qaharman Jazin ministrge ortalyqtyń bas josparyn tanystyryp, biyl paidalanýǵa beriletin 20 zamanaýi nysan jaily túsindirip ótti. Bul nysandar týristik, meditsinalyq maqsatta qoldanylmaq. Sonymen birge, investitsiialyq jobalardy jandandyrý joldary da kórsetildi.
Halyqaralyq ortalyqtyń qazaqstandyq jáne qytailyq bóligimen jan-jaqty tanysqan Arystanbek Muhamediuly «Qorǵas – Shyǵys qaqpasy» EEA aýmaǵyndaǵy qurǵaq portqa taban tirep, jańadan boi kóterip jatqan logistikalyq, indýstrialdy aimaqtardyń jai-kúiin qarap shyqty. «Qorǵas – Shyǵys qaqpasy» aldaǵy ýaqytta tasymaldanatyn taýarlardy ónerkásiptik jolmen qaita óńdeýge molynan múmkindik beretin port retinde tanymal bolmaq. Port keleshekte Eýraziia aimaǵyndaǵy Qazaq- stannyń eksporttyq-tranzittik áleýetin pash etip, aýqymdy logistikanyń damýyna tyń serpin bermek. Sonymen birge, álemdik investitsiiany Qazaqstanǵa tartýdyń birden-bir kózi de osy jer. Budan bólek, bul port Elbasy bastamasymen jasalǵan «Nurly jol» memlekettik baǵdarlamasyn júzege asyrýdyń aiqyn dáleli.
Shekara shebindegi Erkin ekonomikalyq aimaqtyń qurylysyn tolyq aiaqtaý taiaýdaǵy eki-úsh jyldyń ishinde júzege aspaq. Bul jerde 30 myń adamdy jumyspen qamtý kózdelgen. Keleshekte dál osy jerden 100 myń turǵyny bar shyraily qalanyń irgetasy qalanady. Sondai-aq, qurǵaq port arqyly ótetin «Batys Eýropa – Batys Qytai» avtodáliziniń, «Jetigen – Qorǵas» temirjolynyń mańyzy zor. Osy ortalyqtan Aqtaý teńiz portyna shyǵatyn múmkindikter de qarastyrylý ústinde. Shekaraly aýdanda qolǵa alynǵan halyqaralyq mańyzy bar qurylys nysandarymen tanysqan ministr aldaǵy ýaqytta jobalardy budan ári jandandyrýǵa bailanysty naqty tapsyrmalar berdi.
Qozybai QURMAN,
Almaty oblysy
