Sanaýly kúnderden soń musylman qaýymy Qurban ait meiramyn qarsy alady. Álemdegi jáne eldegi epidemiologiialyq jaǵdaiǵa bailanysty qasietti meiramdy qarsy alý men ony atap ótý erejelerine ózgerister engizildi.
Qaýipsizdik erejelerin saqtai otyryp Qurban aitty qarsy alý taqyrybynda QazAqparat tilshisi Qazaqstan musylmandary dini basqarmasy tóraǵasynyń orynbasary, naib múfti - Ershat qajy Aǵybaiulymen suhbattasqan bolatyn.
«Qurban aitty karantin jaǵdaiynda tiisti sanitarlyq sharalardy saqtap qarsy alǵan durys. Iaǵni bul kúni qonaq kútip, qonaqqa barýdy qoia turǵan jón. Óitkeni, islam adam balasynyń ómiri men densaýlyǵyn qorǵaýdy asyl maqsat tutqan din. Iaǵni adamnyń ómirin qorǵaý, búkil adamzattyń ómirin qorǵaýmen teń. Iá, bizdiń dástúrimizge sáikes Qurban ait kezinde bir-birimizge qonaqqa baratynyz bar. Degenmen qazirgi jaǵdaidy eskere kele, qonaqqa barý jaǵyn toqtata turǵan jón», - dedi Naib múfti Ershat qajy Aǵybaiuly.
Onyń aitýynsha, qasietti meiramdy ár azamat óz otbasynda jaqyndarymen birge qarsy alǵan durys.
«Biylǵy Qurban ait meiramyn qarsy alý eldegi indettiń taraýymen bailanysty artyq júris-turysty azaitýmen, onlain túrde ótýimen erekshelenedi. Iaǵni ár azamat merekeni óz otbasynda qarsy alǵany jón. Sonymen qatar, ózderińiz biletindei biyl qajylyq saparyna da shek qoiyldy. Bul da adamzat qaýipsizdigin qamtamasyz etý maqsatynda jasalynyp otyrǵan saqtyq sharalarynyń biri. Árine, bul meiram keshirimdi bolyp, saýapty isterdi kóptep isteitin sát. Pendelerdiń bir-birine jaqsylyq jasaýyna, igi tilek aityp, muqtaj jandarǵa kómektesip saýap alýyna indet pen karantinniń eshqandai qatysy joq», - deidi ol.
Sondai-aq, basqarma ókili karantin jaǵdaiynda qurbandyq shalý, namaz oqý jáne quran baǵyshtaý dini dástúrlerine qatysty da óz pikirin bildirdi.
«Atalǵan dini dástúrlerdiń barlyǵy saqtyq sharalaryn saqtai otyryp, onlain ótkeni abzal. Qurbandyq shalýshy jandarǵa arnalǵan Qurban2020.kz saityn iske qosyldy. Bul degenimiz azamattarymyz qurbandyqty úiden shyqpai onlain túrde jasai alady. Munyń mazmuny siz din ókilin qurbandyq shalýǵa ókil etesiz. Iaǵni siz tapsyrys bergen ýaqyt pen siz tańdaǵan qurbandyq túrine sáikes din ókili sizdiń atyńyzdan duǵa jasap, qurbandyq shalady. Degenmen keibir adamdar qurbandyqtyń onlain túrde shalynǵanyna senbeýi múmkin, ondai jaǵdaida biz qurbandyqtyń shalyný sátiniń dálelin jibere alamyz. Biraq maldy soiý kezinde qan tógilip, pyshaqpen qansyratyp kesip, tilip jatqan sátin jibere almaimyz. Sebebi ol sát adamnyń psihikasyna keri áserin tigizýi múmkin. Taǵy bir aita ótetin másele, karantinge bailanysty meshitterdiń esigi jabyq, eshqandai ait namazy oqylmaidy. Al quranǵa kelsek árkim óz betimen, óz úiinde niet etýine árine, bolady», - dedi E. Aǵybaiuly.
