Qurban ait merekesi 9-11 shilde aralyǵynda ótedi. Eldegi sanitariialyq-epidemiologiialyq jaǵdaiǵa bailanysty, sondai-aq turǵyndar arasynda SOVID-19 jáne jiti ishek infektsiialarynyń taralýyna jol bermeý maqsatynda Sanitariialyq-epidemiologiialyq baqylaý komiteti birqatar saqtyq sharalaryn usynady, dep habarlaidy QazAqparat.
Komitettiń resmi ókili Erjan Baitanaevtyń málimetinshe, mal soiýdy veterinariialyq anyqtama bolǵan jaǵdaida ǵana júrgizý kerek. Qurban2022.kz saityna ótinim bere otyryp, onlain rejimde qurbandyq shalýdy uiymdastyrý múmkindigin de paidalanǵan abzal.
«Jabyq úi-jailarda, adamdar kóp shoǵyrlanatyn oryndarda buqaralyq is-sharalardy ótkizý kezinde qashyqtyqty saqtaý jáne betperde kiiý, qoldy jii antiseptikpen óńdeýge keńes beremin. Qoǵamdyq tamaqtaný obektilerinde (toihana, meiramhanalar, dámhanalar, ashanalar, meshitter jáne t. b.) jáne salttyq is-sharalardy ótkizý boiynsha qyzmet kórsetetin nysandarda ártúrli is-sharalardy ótkizý kezinde úide daiyndalǵan taǵamdardy paidalanbaǵan jón. Tez buzylatyn ónimderdi salqyn orynjailarda saqtap, azyq-túlik ónimderin, ásirese sút, salattar satyp alǵanda, jaramdylyq merzimine, shyǵarylǵan kúnine nazar aýdaryńyz, daiyndalǵan taǵamdy bólme temperatýrasynda 2 saǵattan artyq qaldyrmańyz», - dep jazdy Baitanaev.
Resmi ókil, kezdeisoq adamdardan nemese ruqsat etilmegen saýda oryndarynan tamaq ónimderin satyp almaýǵa shaqyrdy. Jańa daiyndalǵan taǵamdy aldyńǵy kúnniń qaldyqtarymen aralastyrmaý, daiyn taǵam kelesi kúnge qalsa, ony qoldanar aldynda termiialyq óńdeýden ótkizý (qainatý nemese qýyrý) asa mańyzdy.
Turǵyn úidi únemi taza ustaý jáne jeke gigiena erejelerin saqtaý, kishkentai balalarǵa qainatylmaǵan sút, shiki jumyrtqa bermeý, tamaq daiyndaý úshin tek jańa (balǵyn) ónimderdi paidalaný da nazarda bolǵany durys.
