Qurban Ait merekesine orai Qaraǵandy oblysynda búgin 1500-ge jýyq mal qurbandyqqa shalyndy.
Soiylǵan mal eti 3 myńnan astam muqtaj otbasylarǵa taratyldy, sonymen qatar 4 mln. 211 myń teńge somasyna azyq-túlik qorjyndary tabystaldy, dep habarlaidy "Ult aqparat".
Biylǵy jyly karantin jaǵdaiynda Qurban ait rásimin ótkizý boiynsha birqatar is-sharalar pysyqtaldy.
Qaraǵandy oblysynyń bas memlekettik sanitariia dárigeriniń 2020 jylǵy 29 shildedegi № 32-q «Qaraǵandy oblysy aýmaǵynda Qurban ait merekesi kúnderi koronovirýstyq infektsiiasynyń taralýyna yqpal etýshi is-sharalardy ótkizýge tyiym salý týraly» qaýlysy qabyldanyp, osy qaýlyǵa sáikes is-sharalar qabyldandy.
Oblys aýmaǵynda 243 meshit qyzmetin atqarady. Qalalyq ákimdikter men meshit ókilderi arasyndaǵy kelisim boiynsha mal soiatyn oryndardy daiyndaý jáne qajetti quraldarmen jabdyqtaý jumystary pysyqtaldy, sondai-aq bekitilmegen oryndarda qurbandyq shalýǵa jol bermeý týraly tapsyrmalar ákimdikterdiń erekshe baqylaýyna alyndy.
Qaraǵandy oblysynda barlyq qalalar men aýdandarda 18 mal soiý orny anyqtaldy, onyń ishinde 51 mal etin saqtaityn tońazytqysh, 79 mal etin taratatyn kólik daiyndaldy. Qurbandyqqa shalynǵan maldyń etin 93 qasapshy bólip, óńdedi. Al 200-den astam erikti mal etin taratýmen ainalysty. Bul jumystardyń barlyǵyn tekserý maqsatynda tiisti jaýapty politsiia, veterinariia qyzmetkerleri, sanitarlyq dárigerler sekildi mamandar bekitildi. Jumystar kórsetilgen algoritm boiynsha júrip jatyr.
Buqaralyq aqparat quraldarynyń qatysýymen brifing ótkizilip, turǵyndar arasynda aýqymdy túsindirý jumystary jasaldy. Oblystyq bas memlekettik sanitariia dárigeriniń, Oblystyq ortalyq meshitiniń bas imamy Ómirzaq Bekqojanyń qatysýymen «Saryarqa» telearnasynda «Qurban ait» merekesin ótkizýine bailanysty brifing ótkizildi. Sonymen qatar «Pervyi Karagandinskii», «5 kanal», «Life 09» telearnalarynda suhbat berildi. Onlain túrdegi qurban shalý týraly arnaiy rolikter men aqparattyq infografikalar halyq arasynda keńinen taratyldy. Áleýmettik jeliler arqyly meshit imamdary men aqsaqaldar biylǵy jyly «Qurban ait» qurbandyq shalýdyń erekshe rásiminiń tártibi týraly túsiniktemeleri jariialandy.
Búgingi kúni «Qurban2020.muftyat.kz» arnaiy saityna 240 tapsyrys kelip tústi (onyń ishinde 140 tólem jasaldy), sondai-aq muqtaj jandardyń 358 ótinishi qabyldandy. 1439 mal (69 siyr, 1370 qoi) qurbandyqqa shalyndy, qazirgi ýaqytta mal eti 3230 muqtaj otbasylarǵa taratyldy, sonymen qatar jalpy 4 mln. 211 myń teńge somasyna azyq-túlik qorjyndary tabystaldy.
