Qurban ait merekesine orai Almaty oblysynyń 11 myńnan astam otbasyna et taratyldy, - dep habarlaidy "Ult aqparat".
Koronavirýs indetine bailanysty biyl Almaty oblysynyń turǵyndary Qurban ait merekesin jańa erejeler boiynsha atap ótti. Jáne Qazaqstan musylmandary dini asqarmasynyń Taldyqorǵan óńiri boiynsha bas imamy Ardaq Orazbaevtiń bastamasy boiynsha qasietti musylman meiramyna daiyndyq ádettegiden erterek bastaldy.
«Biyl karantin sharalaryna sáikes jáne qatań sanitarlyq normalardy saqtai otyryp, Taldyqorǵanda arnaiy bólingen jerde 1 túie, 56 iri qara, 611 usaq mal qurbandyqqa shalyndy. Al avtovolonterler 5531 muqtaj, kópbalaly otbasylarǵa, týa bitken aýrýlary bar adamdarǵa, qart adamdar men aýrýhanalarǵa et jetkizdi»,- dedi Ardaq Orazbaev.
31 shilde men 2 tamyz aralyǵynda Almaty oblysy boiynsha 1 túie, 145 bas iri qara jáne 3409 bas usaq mal qurbandyqqa shalyndy. Al 400-ge jýyq eriktiler men avtovolonterler 11 225 muqtaj otbasyna et jetkizdi.
Mysaly, onlain ótinim arqyly Alakól aýdany boiynsha barlyǵy 17 iri qara jáne 530 usaq mal soiyldy. Al et 1064 muqtaj otbasyna taratyldy.
Kerbulaq aýdanynda «Maitóbe et» JShS mal soiý pýnktinde 47 bas iri qara men 12 bas qoi qurbandyqqa shalyndy. Eriktiler men avtovolonterler 636 kópbalaly jáne az qamtylǵan otbasylarǵa et jetkizdi.
Sondai-aq, «Qurban ait» merekesi kezinde Eskeldi aýdany boiynsha 15 bas iri qara, 321 usaq mal soiyldy. Etti 865 kópbalaly jáne az qamtylǵan otbasy aldy.
Eske salaiyq, onlain rejiminde qurbandyq shalý oblystyń barlyq aýdandary men qalalarynda 25 arnaiy bólingen jerde ótti.
