Elordada dástúrli qurban shalý oryndary jabyq bolady. Qurban shalý úshin «Qurban2020.kz» saity iske qosyldy, dep habarlaidy QazAqparat qala ákimdiginiń resmi saityna silteme jasap.
Nur-Sultan qalalyq din isteri basqarmasy qasietti Qurban ait merekesi qarsańynda qurban shalý tártibin túsindirdi. Sanitarlyq-epidemiologiialyq ahýalǵa bailanysty qala meshitterinde 31 shilde kúni Ait namazy oqylmaidy. Qoǵamdyq qaýipsizdikti, adamdardyń kóp jinalmaýyn qamtamasyz etý maqsatynda qala aýmaǵynda ornalasqan dástúrli qurban shalý oryndary (bazarlar, sharýa qojalyqtary) jabyq bolady.
«Osy oraida, alǵash ret qashyqtan qurban shalýdy uiymdastyrý maqsatynda «qurban2020.kz» saity iske qosyldy. Atalǵan saitta kez kelgen azamat onlain túrde qurban shalýǵa tapsyrys bere alady. Qurbandyqqa soiylǵan et túgeldei áleýmettik kómekke muqtaj otbasylarǵa úlestiriledi», – delingen habarlamada.
«Qurban2020.kz» saitynda muqtaj jandarǵa arnaiy «Qurbandyq etin alý úshin ótinish qaldyrý» fýntsiiasy da iske qosyldy. Tiisti qujattardy júkteý arqyly muqtaj otbasylar áleýmettik kómek alý úshin onlain ótinish joldai alady. Sonymen qatar elorda aýmaǵyna satý maqsatynda iri qara mal men qoi kirgizý shekteledi. Din isteri basqarmasy turǵyndardy sanitarlyq-epidemiologiialyq qaýipsizdik erejelerin saqtaýǵa shaqyrady.
Aita ketsek, biyl Qurban ait merekesi 31 shilde men 2 tamyz aralyǵynda ótedi.
