Almatyda qarttardyń baspanasyn zańsyz iemdenýge qatysty birneshe qylmystyq is tergelýde. Biyl 81 jastaǵy zeinetkerdi urlap, páterin berýge májbúrlegen kúdiktiler sotqa jiberildi. Al 61 jastaǵy er adamnyń ólimine qatysty tórt kúdikti ustaldy. Tergeýshiler olardyń marqumnyń páterin zańsyz rásimdeýge qatysy bar-joǵyn anyqtap jatyr, dep habarlaidy ult.kz.
Jetinshi arnanyń málimetinshe, buǵan deiin Almatyda baspanaǵa bailanysty aýyr qylmystar tirkelgen. Bir qylmystyq top 2006–2012 jyldary toǵyz adamdy óltirgen. Al basqa is boiynsha 22 adam sottalyp, materialdarda 30-ǵa jýyq páter atalǵan.
Zańger Sergei Ýtkinniń aitýynsha, notariýs múlik iesiniń qujatqa óz erkimen qol qoiyp otyrǵanyna kóz jetkizýi kerek. Kúdik týyndasa, mámileni toqtatqan jón.
Mamandar senimhatpen kelgen ókil páter iesimen ońasha sóilesýge kedergi keltirse nemese baspana naryqtaǵy baǵadan áldeqaida arzan usynylsa, saq bolýǵa shaqyrady. Qart týystardyń jaǵdaiyn únemi bilip, kúmándi mámileler aldynda zańgerden keńes alǵan mańyzdy.
