Tanymal aqyn Quralai Omardyń bir top jańa óleńin nazarlaryńyzǵa usynamyz.
***
Jasyrynbaq oinap júrmiz,
Jasyrynyp birimizden-birimiz.
Bir álemde sózder sýyq,
Sezim - yzǵar, gúli - muz.
Hat ta jazbai, habarlaspai, óp-ótirik umytyp,
Ár sát saiyn baqylaimyz...
Osy - umytqan túrimiz.
Kóńilimdi qamshy osyp, qanjar jáne suǵylyp,
Álim kelmei ári asýǵa, qaita-qaita jyǵylyp
Júrgenimdi kórsetpeimin,
Kúlip túsip sýretke,
Keshke qarai jylap jatam júregime tyǵylyp.
Únsiz qalsam, belgi berip, daýystasam - jortasyń,
Qashasyń da sur álemge, qushaqtaisyń sor tasyn.
Jasyrynbaq oinap júrmiz,
Jalǵasady qashanǵa?..
Jaqyndaýǵa júreksinip,
Joǵaltýǵa qorqasyń.
***
Ózimniń jolymdy qansha ret bógedim?!
Ózińdi jazǵyryp, ózimdi sógemin.
Júrekten móldirep úzilgen sózderdi
Amalsyz
Tórtburysh qaǵazǵa tógemin.
Alysta armandar, aspanda aq úmit.
Qiialdyń aq kúmis qanatyn taǵynyp,
Ushýǵa qoryqtyń,
Jerdegi
Tórtburysh zańdarǵa baǵynyp.
Estilmei qus úni, jańbyr men qar áni,
Tórtburysh telefon jalǵamai arany,
Janymdy muzdatyp...
Tórtburysh bólmede
Dúnie dóńgelep barady.
***
Bárinen sharshap kettim:
Janymdy muzdatqan kóktemnen,
Júrekti syzdatqan ótkennen.
Ap-aýyr azapty shegýden,
Ún-túnsiz jasymdy tógýden.
Máni joq ǵumyrdy kezýden,
Qajet emestigimdi sezýden.
Kólikter sabylǵan kósheden,
Aiyptai beretin kesheden.
Úmitim tonalyp qalǵannan,
Aldamshy bes kúndik jalǵannan.
Sharshadym taýsylmas muńymnan
...Eshteńe shyqpady bunymnan...
***
Júrek júdeý,
Kóńil synyq,
Synyq kún.
Sen de búgin hal suraýdy umyttyń.
Sen de sýyq,
Kúz de sýyq, qaitemin,
Dir-dir etip tońǵanyn-ai úmittiń.
Jel ushyryp japyraqtai armandy,
Sup-surǵylt kún qara túnge jalǵandy.
Bir jaryqqa júgirip em asyǵyp,
Súrinip qap...
Sezim taǵy aldandy.
Taiǵanaqtaý taǵdyrymmen egesem,
Qulap qaldym,
Jylap ta aldym...
Ne desem?
Baqytty bop keter edim qazir-aq,
Jyly-jyly sózderińmen demeseń.
***
Qaiysqan qabyrǵany taǵy da búger muń kep,
Kútýmen ótken ómir jigerdi úger kúndep.
Sen úshin múlde-múlde quny joq bolsa daǵy,
Otyram ózińe arnap, hat jazyp jibergim kep.
Tuman oi janshyp jandy, júre almai áreń kelem.
Sup-sýyq bolyp ketti sur qala, álem neden?
Toń qatqan tirshilik te tońdyra almas edi,
Bir aýyz hatyń kelse, jai ǵana “sálem” degen.
***
Qýanta almady-aý batsa da kesh kúlimdep...
Ózińe oralǵym kep, únińdi estigim kep,
Kózimdi jumyp alyp, kúrsinem únsiz ǵana,
“Bes kúndik jalǵanymnyń eń tátti bes kúni” dep.
Juldyzǵa syr aqtaryp, aitýmen aiǵa da ańyz,
Bir kúni ekeýmiz de óleńge ainalamyz.
Táńirdiń qolyndaǵy taǵdyrǵa baǵynyshty
Dármensiz jandarmyz ǵoi, qaiteiik, jai ǵana biz.
***
Taǵdyrymnyń kelispei júr sáni de,
Óter deimiz, keter deimiz bári de.
Sáýir aýmai táýir bolmas siiaqty
Júregimniń hali de.
Kózdi jumsam, saǵyndyrǵan bal shaǵym
Umyt bolsa... umytylyp qalsa muń.
Bári jaqsy bolady dep ózimdi
Jubatýdan sharshadym.
Kóńil qaldy, ómir qaldy lailanyp,
Kettik nege beitanysqa ainalyp?
Sezgiń kelmes meniń myna kúiimdi,
Jattap alǵan tirligińe bailanyp.
***
Ózińdi óziń aldaisyń,
Ózińnen óziń shalǵaisyń.
Túrmege qamap júrekti...
Jańbyrmen birge án salyp,
Jelmenen bilei almaisyń.
Sezimdi solai jasyttyń,
Arman da ushqan qashyq tym.
Jaily bir tordy taýyp ap,
Tutqyn bolýǵa asyqtyń.
Taǵdyrdyń sezip bótenin,
Janyńnyń tappai mekenin...
Umytyp bir kún qalarsyń,
Qanatyńnyń bar ekenin.
Quralai Omar 1983 jyly Shyǵys Qazaqstan oblysy, Zaisan aýdany, Jambyl aýylynda dúniege kelgen. 2000 jyly Óskemen qalasyndaǵy Jambyl atyndaǵy gimnaziia-internatyn, 2004 jyly Sársen Amanjolov atyndaǵy Shyǵys Qazaqstan memlekettik ýniversitetiniń filologiia fakýltetin bitirgen.
2004 jyly Halyqaralyq «Shabyt» festivalinde Erik Asqarov atyndaǵy arnaiy júldege, 2006 «Jalyn» jýrnalynyń Tólegen Aibergenov atyndaǵy syilyǵyna ie bolǵan. 2007 jyly onynshy Halyqaralyq «Shabyt» festivaliniń bas júldesin jeńip aldy. 2008 jyly «Jalyn» baspasynan «Aq qar», «Mendegi únsizdik» atty jyr jinaqtary jaryq kórgen.2008 jyly «Jalyn» baspasynan «Aq qar», «Mendegi únsizdik» atty jyr jinaqtary jaryq kórgen.
Istochnik: http://kaztrk.kz/news/portal/page-64656-poeziya-aleminde-kuralai-omar-46608
Liýboe ispolzovanie materialov dopýskaetsia tolko pri nalichii giperssylki na http://kaztrk.kz
