videodan alynǵan kadrlar
Petropavl ákimi jaqynda bolǵan órtten 9 baspananyń janyp ketýine bailanysty sógis aldy, dep habarlaidy QazAqparat.
Soltústik Qazaqstan oblysy ákimdigi apparatynyń otyrysynda Petropavl qalasynyń ákimi Rýslan Ańbaev sógis aldy. Oǵan negiz – órttiń aldyn alýda tiisti jumystyń jasalmaýy. Máselen, qýraǵan shópti shaýyp, joiý úshin biýdjetten jylda qarajat bólinedi. Biyl osy maqsatqa 67 mln teńge josparlanǵan, alaida tiisti jumys júrgizilmegen.
«Qala ákimi jumysty durys uiymdastyrmaǵan. Qýraǵan shóp-qamys der kezinde shabylmaǵan. Osyndai jaýapsyzdyqtan turǵyndar baspanasyz qaldy. Bar múlkinen, qujattarynan aiyryldy. Munyń aldyn alýǵa bolar edi, eger de tiisti jumys ýaqytynda júrgizilse. Arnaiy qarjy bólinbese, aqsha bolmasa men túsiner edim», - dedi oblys ákimi Aidarbek Saparov.
Esterińizge salaiyq, 7 mamyr kúni Petropavldaǵy Bereke yqsham aýdanynda qamys janyp, arty aýqymdy órtke ulasty.
Sol kúni qatty jel turyp, tilsiz jaýdy aýyzdyqtaýǵa úsh saǵat ýaqyt ketti. 9 úi kúlge ainaldy, taǵy ekeýine zaqym keldi, olar turýǵa jaramaidy. Saldarynan 11 otbasy baspanasyz qaldy.
Osy oqiǵaǵa qatysty Petropavlda jergilikti aýqymda tehnogendik sipattaǵy tótenshe jaǵdai rejimi engizildi. Bul dalada qalǵan otbasylarǵa QR zańnamasy aiasynda keltirilgen shyǵyndy qysqa merzimde óteý úshin engizilip otyr.
Qazirgi ýaqytta órtten zardap shekkender ýaqytsha baspanada turyp jatyr.
Táýelsiz sarapshylar turǵyndarǵa keltirilgen materialdyq shyǵynnyń mólsherin eseptep jatyr. Sondai-aq baspana ielerine 100 AEK mólsherinde ótemaqy da berilmek.
