2018 jyly 30 myńǵa jýyq qazaqstandyq otbasy «Turǵyn úi qurylys jinaq banki» arqyly qonys toiyn toilady.
Qyryq bes jastaǵy aqtóbelik politsei Qairat Muhtarov óz úiim bolsa dep kópten beri armandaǵan edi. Tórt balanyń ákesi 25 jyldan beri bul salada qyzmet etedi. Balalarynyń kishkentaiy mektepte oqidy. Al, jary bolsa balabaqshada tálim beredi. Bul otbasy kóp jyldan beri páter jaldap turǵan-dy. Ai saiyn páteraqyǵa 60 myń teńge jumsaýǵa týra keletin. Árine, otaǵasy baspana máselesin qalai sheshý týraly jii oilandy.
Erli-zaiyptylar alty jyl buryn «Turǵyn úi qurylys jinaq bankine» salym salýdy sheshti. Búginge deiin olar 3 million teńge kóleminde qarjy jinai aldy. Qairat eki jyl buryn jer teliminiń kezegine turdy. Endi mine, bul otbasynyń arman-tilegi oryndaldy desek te bolady. Iaǵni, olar «Nurly jer» baǵdarlamasy boiynsha «Nur-Aqtóbe» shaǵyn aýdanynan jańadan boi kótergen eki qabatty kottedjdiń iesi atandy.
- Meni bári qanaǵattandyrady. Jalpy aýmaǵy 152 sharshy metrli úiimiz óte jaryq, ádemi, keń. Úidiń mansardty bolǵany da jaqsy boldy. Barlyq jaǵdai jasalǵan ári jyly. Jańa jylda otbasymyzben barsaq dep otyrmyz, - deidi Qairat Muhtarov.
Talaptarǵa sai, otbasy segiz jyl boiy ai saiyn 100 myń teńge tólep kelse, keiin tólem quny eki ese azaiady. Iaǵni baǵa aiyna 50 myń teńge kóleminde bolady. Bul, tiisinshe, olardyń ai saiyn jaldamaly páterge ketken aqshalarynan az. Jalpy alǵanda, nesieni 19 jylǵa bergen. Nesie boiynsha jyldyq stavka 5% quraǵan.
Búginde Qazaqstannyń turǵyn úi qurylys jinaq banki usynǵan ónimder men jobalarǵa suranys óte kóp. 2018 jyldyń on aiy boiynsha bizdiń bank jalpy qazaqstandyq ipoteka 63% úlesin xalyqqa usynyp otyr.
Osy kezge deiin 30 myńnan asa el turǵyny qonys toiyn ótkizse, olardyń 7 myńǵa jýyǵy "Nurly jer" memlekettik baǵdarlamasy boiynsha baspanaly boldy. Al, Aqtóbe qalasynda 1400 januia jańa úidiń kiltine qol jetkizdi. Odan bólek 300 adam qujat rásimdeý kezeńinde. Jyl sońyna deiin taǵy myńǵa tarta otbasy qýanyshqa kenelmek.
"Bul sandar qazirgi tańda eń ózekti jáne ótkir qoǵamdyq problemalardyń biri - xalyqty qoljetimdi baspanamen qamtamasyz etý máselesiniń naqty nátijesi men júieniń tiimdiligin kórsetedi", - deidi TÚQJB Aqtóbe óńiri boiynsha ortalyq filialy basshysynyń orynbasary Raýan Baiash.
Bank qyzmetkerleriniń aitýynsha, qajetti sharshy metrlerdiń iesi bolý úshin Turǵyn úi qurylys jinaq bankiniń klienti atanyp, óz depozitińizge baspana baǵasynyń keminde 20% kólemindegi aqysyn jinap qoisańyz jetkilikti.
Osylaisha "Nurly jer" baǵdarlamasy boiynsha úmitker atanýǵa bolady. Jyldyq stavka mólsheri - 5%. Mysaly, 5 280 000 teńge turatyn 44 sharshy metr kólemindegi bir bólmeli páterdiń iesi ataný úshin depozitte million teńge shamasynda qarjyńyz bolýy tiis.
Maksimaldy merzimge bólip eseptesek, 8 jyl boiy ai saiynǵy tólem 35 728 teńge (5% jyldyq stavka) bolsa, odan keiin 11 jyl boiy 17 087 teńge (3,8%) kóleminde tóleisiz.
