Jas aqyn Qundyz Jubaevanyń bir top jańa óleńin oqyrman nazaryna usynamyz.
***
Janym ada-
Jazǵyrýdan, kekten de,
(Jaramdy osyp ketse-daǵy kóp pende...)
Syrty- bútin, ishi- dúlei búlik bop,
Qala berem...
Sabyr deitin sert mende.
Bar shattyǵyn tókseń de úiip ǵalamnyń,
Bir Úmitti jalǵai almai Kóktemge-
Keide bar ǵoi...
amal tappai qalamyn-
Jalǵyzdyqta,
Jan aýyryp ketkende...
***
Japyraǵyndai jabyrqaý, jaraly kúzdiń...
Tońazyp sala bergeni-ai aramyz bizdiń.
Kún jaýmap edi...
Kelmedi jáne kúz áli...
Kók tuman tústi kórkin ap,
Qalanyń izgi...
Mezgilsiz edi barlyǵy...
men de únsiz edim,
Aiaýsyz tyrnap tústim be jarany sizdiń:
- músirke, meili... aiarlyq tanytar qushaq,
Jasymen sulý kóredi janaryn qyzdyń...
Al, sodan...
Japyraǵyndai qaltyrap qusaly kúzdiń...
Shyqpaǵan shala jany qap tusaýly sózdiń.
Saǵynysh deitin-
bir qurbym;
Kóńili- jesir...
Súiýge májbúr etken-di uzaǵan izdi...
Tamyz túspei-aq... tońazyp qalǵanda janym,
Saǵynyp ketken sátim bul qushaǵyńyzdy...
Aiaýly qushaǵyńyzdy...
***
Búginde...
Sergeldeń etken sezim de ermek,
kúi ermek,
Jalǵany jattyń janymdy osyp kúler kep,
Jarym dep sengen,
Jarasyn tyrnap salsa da,
Shattyqtan basym ainalyp turyp sonshama,
Ómirden artyq, ózimnen artyq súiem dep...
Aitqanym este,
Demeimin sózden jirendim...
Shylbyrynda qap
Kúiki-kún, tirlik- kúibeńniń.
Otqa da shoqqa tənimdi tósep úirendim...
Arylyp bolmas jaiym bar osy kúiden men,
Jabyrqaý júzim, qulpyrtyp qyzyl kigenmen,
jaraspady ol da...
Janymdy turǵan syzdatyp
Jaram bar edi...tańýǵa kelmes jeideńmen.
Al, aityńyzshy, ne taptym sonda men Sizdi,
Ómirden artyq, ózimnen artyq súigennen...
***
Túp-túzý jol kórsetip,
Tuiyqta Es aldaidy.
Bul meniń jolym emes,
Júrmeimin, basa almaimyn.
Bul jolda bolý kerek,
Qulaǵan izderim de.
Qurbylar júrý kerek,
Muńy bar kózderinde.
Qýanǵan kezim qaida,
Keýdeńnen kókke ushardai.
Órtengen ózim qaida?
Qulashtap ot qushardai.
Bul meniń jolym emes,
Bar edi belesi onyń.
Əi, aqyl, kórsetpeisiń,
Kózime nege sony.
Beles- ol, asý qiyn,
Aryńdy belden basyp.
Qai tasqa soǵylmady,
Ózińsiz júrgen basym.
Bul meniń jolym emes,
Qalaisha synaǵanyń?!
Tógilgen jasym qaida,
Tógilgen kúnəlarym.
Túp-túzý jol kórsetip,
Tuiyqta Es aldaidy.
Bul meniń jolym emes,
Júrmeimin, basa almaimyn.
***
Dál osynsha aqymaq bolady adam,
Joly ózgege jón edi qaramaǵan...
Tamyrym-órt, sóndi me, sóndirdim be?
Órteń bolyp qalǵanym shamaly odan.
Túsinińiz...
Sizdei jan tabylmaýyn,
Saǵynyshpen jazalar Táńir baryn...
Mendik uiat jetedi, mendik sezim
Taǵy qaita bastaýǵa...
Bárin...bárin...
Bári ótkesin, qala ma jylap Arym,
Ol jaiynda túk deme... suramaǵyn!
Siz oqyǵan jyrlarǵa shala mas bop,
Aldyńyzda áiteýir tura alamyn...
***
"...Syi azdaý táleiime
Syimady neler taǵy?!
Ózimnen kóreiin be?
"Sezim" dep Seni ańsadym.
Kináli Qudai desem,
Muńyma, munar-saǵym.
Qarǵasa qansha quly,
Qaiǵydan óler shaǵy
jetti ǵoi...
Ózim-batyr;
Ózimdi jeńem shyǵar...
Jer emes, tabanymda,
Bul - meniń Óleńsharym"
***
...joǵalǵym kelgen Sátterdiń,
Satqyny ekem-
Kim deseń?!
Sen qaidan biraq, bilip eń?!
Jalǵyz da qaldym,
Senimnen ada...
Kún keship,
Qairansyzdyǵyma kúlip El.
E, meili... dedim,
Kim qalai tanyp, biledi...
Ózimshe ómir súremin.
Aidyń jaryǵy sekildi-aý adam júregi,
Jylýsyz - jaryq;
Nury-Óli.
Ketýi - Ǵaiyp pendeshe,
Kelýi - Jańa.
Tek qara túnge sińbes em.
Shúberekterdiń sherýi ǵana-
Bul Ómir-
bul Kóshe!
***
...Qaiyrmasyna qosylyp san uqqan ánniń,
Saǵattai soǵyp turam da, tynyp qalamyn.
Súiýdiń tilin bilgenshe ókinish, qaiǵy,
Kóbelekteiin qushtary-ai Jaryqqa jannyń.
Tunyǵyna tas laqtyryp alyp Ǵalamnyń,
Bireýdiń kórsem Tirlikten qamyqqan janyn.
Egilip qaitem?!
jaýmai-aq tarqap ketetin,
Kóńilshek bulttai keledi qalypqa bári.
Qundyz Jubaeva – 1992 jyly 29 jeltoqsanda Aqtóbe oblysy, Baiǵanin aýdany, Kemershi aýylynda dúniege kelgen. Abai atyndaǵy Qazaq ulttyq pedagogikalyq ýniversitetiniń filologiia jáne álem tilderi fakýltetiniń túlegi.
