Roza Baǵlanova atyndaǵy «Qazaqkontsert» memlekettik akademiialyq kontserttik uiymynyń «ASTANA MUSICAL» memlekettik teatrynda «Roza Baǵlanova» miýzikly ótti, dep habarlaidy Ult.kz «Qazaqkontsert» baspasóz qyzmetine silteme jasap.
Miýzikl talant pen Otanǵa degen súiispenshiliktiń simvolyna ainalǵan kúmis kómei ánshiniń taǵdyry týraly syr shertedi. Kórermenniń joǵary baǵasyn alǵan sátti qoiylym KSRO jáne Qazaqstannyń Halyq ártisi, Qazaqstannyń Halyq qaharmany Roza Baǵlanovaǵa arnalǵan. Bul qoiylym Ońtústik Koreianyń Tegý qalasynda ótken XVII Halyqaralyq miýzikl festivalinde «Úzdik halyqaralyq miýzikl» jáne «Úzdik áiel beinesi» atty eki bedeldi marapatqa ie boldy.
Miýzikldyń árbir kórinisi - ánshi ómirbaianynyń tek epizody ǵana emes, sheksiz talanty, myqty rýhy jáne Otanǵa degen sheksiz mahabbaty kórinis tapqan shynaiy emotsiialar.
Kórermen tek ánshiniń shyǵarmashylyq jolynyń jarqyn tustaryn ǵana emes, sonymen qatar maidan kúnderi, shyǵarmashylyq jetistikteri men ónerge degen janqiiarlyq qyzmetine kýá bolady. Teatr ártisteri únimen milliondaǵan jannyń júreginen oryn tapqan, eń qiyn sátterde úmit syilaǵan aty ańyzǵa ainalǵan ánshiniń beinesin áserli mýzykalyq nómirler, júrek tebirenter monologtar men kerbez horeografiia arqyly jetkizedi.
Basty rólderde: Roza Baǵlanova – Zarina Makina, Ydyrys (Roza Baǵlanovanyń inisi) – Ashat Baitleý. Qoiýshy-rejissery – «Astana Musical» memlekettik teatrynyń kórkemdik jetekshisi - Eslám Nurtazin. Kompozitory – Qazaqstannyń eńbek sińirgen qairatkeri – Artýr Orenbýrgskii. Qoiylymnyń avtorlary – Efrat Sharipov, Shyńǵys Maman, Aidyn Sahaman jáne Ánnás Baǵdat.
