Qazaqstan Ulttyq Olimpiadalyq komitetiniń prezidenti Timýr Qulybaev mezgilsiz dúnieden ótken Denis Tenniń ata-anasy Oksana Alekseevna men Iýrii Aleksandrovichke kóńil aitý jedelhatyn joldady, dep habarlaidy Baq.kz aqparat agenttigi.
«Óz atymnan jáne Qazaqstan Ulttyq Olimpiadalyq komitetiniń, sondai-aq, elimizdegi barlyq sport qoǵamynyń atynan uldaryńyz Denis Tenniń mezgilsiz dúnieden ótýine bailanysty qaiǵyra kóńil aitamyn. Búgin jas sportshyny tanityn, onyń shyǵarmashylyǵyn baǵalap, talantymen maqtanatyn barsha qaýym úshin qaraly kún. Óziniń sporttyq ǵumyrynda Denis qaitpas rýhymen, qaisarlyǵymen, chempiondyq minezimen kózge tústi. Ol jas bolǵanyna qaramastan, otandyq mánerlep syrǵanaý sportynyń ushar basynda turdy. Búgin Qazaqstan sporty dańqty Chempiondy joǵaltyp aldy. Biz sizdermen birge qaiǵyramyz. Denis Tenniń jarqyn beinesi bizdiń júregimizde máńgi saqtalady», - delingen kóńil aitý hatynda.
