Foto: SMARTNEWS.KZ
Atyraý oblysynyń qylmystyq ister jónindegi mamandandyrylǵan aýdanaralyq sotynda Qulsaryda 7 jastaǵy qyzdy zorlap, óltirgen pedofilge qatysty úkim shyqty, dep habarlaidy Ult.kz SMARTNEWS.KZ basylymyna silteme jasap.
Úkimdi sýdia Zarema Hamidýllina jariialady.
Qandy oqiǵa 5 maýsym kúni bolǵan. Qyz bala aýlaǵa oinaýǵa shyqqan soń, úiine qaita oralmaǵan. Keiin onyń denesi Qursai ózeniniń mańynan tabylǵan.
Tergeý barysynda anyqtalǵandai, 35 jastaǵy er adam mas kúiinde balany zorlap, izin jasyrý úshin tunshyqtyryp óltirgen. Sodan keiin máiitti ózenge tastaǵan. Qylmystan keiin dúkennen ishimdik satyp alyp, tanysynyń aýlasynda uiyqtap qalǵan. Balanyń denesi 12 saǵattan keiin tabyldy.
Sot-meditsinalyq saraptama qyzdyń denesinen zorlyq, soqqy jáne tunshyqtyrý belgilerin anyqtady. Kúdikti óz kinásin moiyndamaǵanymen, sot onyń aiybyn kýágerlerdiń aiǵaqtary, beinejazbalar jáne saraptama qorytyndylary arqyly tolyq dáleldendi dep sheshti.
Aiyptalýshyǵa Qazaqstan Qylmystyq kodeksiniń: 120-baby 4-bóligi («Kámeletke tolmaǵandy zorlaý»), 99-baby 3-bóligi («Kámeletke tolmaǵandy óltirý») boiynsha aiyp taǵyldy. Sot úkimimen ol ómir boiyna bas bostandyǵynan aiyryldy. Jaza erekshe tártiptegi mekemede óteledi. Sonymen qatar, sot qurban bolǵan qyzdyń týystaryna 20 million teńge kóleminde ótemaqy óndirý týraly sheshim shyǵardy.
Sýdia Hamidýllina úkim shyǵarý kezinde atap ótti:
«Mundai damyǵan qoǵamda, beibit zamanda jazyqsyz balanyń ómirin qiyp, asa qatygezdik tanytý — tek bir otbasynyń emes, búkil qoǵamnyń tragediiasy. Bul — adamgershilik pen qaýipsizdik uǵymdaryna soqqy», – dedi ol.
Sońǵy jyldary Qazaqstanda balalarǵa qarsy jantúrshigerlik qylmystarǵa qatysty jazany kúsheitýtýraly talap jiilep keledi. Alaida qoldanystaǵy zańnama boiynsha, elimizde eń aýyr jaza — ómir boiǵy bas bostandyǵynan aiyrý bolyp qala beredi. Mundai úkim kesilgender erekshe kúzettegi túrmelerde, tolyq oqshaýlaýda jazasyn óteidi.
