Foto:massaget.kz
Májilis depýtaty Janarbek Áshimjanov Qazaqstanda túsirilip jatqan filmderdiń sapasy syn kótermeitinin aityp otyr. Bul týraly Ult.kz habarlaidy.
Kino – ideologiia, saiasat jáne ulttyń qaýipsizdigi dep esepteitin májilismen "kino – bútin ultty uiytatyn, sol arqyly jas urpaqtyń sanasyna áser etetin kúshti qarý" deidi. Alaida Janarbek Áshimjanov "kino saiasaty qoǵam kóshin bastaýy kerek edi, al bizdiń bul ónerimiz qoǵamnyń jeteginde ketip barady" dep qynjyldy.
"Dál osy naizaǵaidyń otyna nan pisirip jatqan kezeńde kino – birinshi kezekte biznes emes, óner, ulttyq ustanym missiiasyn atqarý kerek. Sondyqtan rejisserler men stsenarister eń áýeli kinofestivaldardan syilyq alýdy emes, kinonyń ultqa ákeler paidasyn, urpaqqa berer tálimin kóbirek oilaǵany lazym. Ábjylandai ysqyrǵan búgingi jahandaný dáýiri elimizdiń ulttyq kino saiasatyn túbegeili qaita qaraýǵa májbúrlep otyr. Tipti, bala-shaǵamyzben qatar otyryp film kórseń, betińnen otyń shyǵyp kirerge tesik tappaisyń. Anaiy epizodtar men súiegińnen ótetin beipil dialogtar, shup-shubar til, atys-shabys, jadaǵai jargon sózder, odan qalsa ár jerden urlap-jyrlap, kóshirip alǵan inkýbator-filmder. Kerek deseńiz, mundai teris imidj týdyratyn filmder aqyl-esi túzi jurttyń ashýyn týǵyzýda", deidi depýtat.
Onyń pikirinshe qatań súzginiń joqtyǵynan qazaqtyń kórkem de shuraily tili kúirep jatyr. Ekran men efirde kósheniń tili ústemdik ala bastady. Sonymen qatar, dástúrińdi dáldúrish qyp, teris dini aǵymdardyń nasihatyn kúittep júrgen taspalar da joq emes.
"Ótken 2024 jyly qazaqstandyq 90 film prokatqa shyǵypty. Sonyń 56-y – komediia. Kúldiremiz dep búldirip jatyrmyz. Jalpy, qazir kúletin kezeń be?.. Kartinalar jyl saiyn 30 filmge tolyqqan. Kassadan túsken túsimder de az emes. 6 film milliard teńgeden astam kassa jinaǵan. Biraq kópshiliginiń sapasy syn kótermeidi. Kóbi tarihi, ekshn, komediialyq, avtorlyq filmder. Ulttyq kinolardyń qatyr tym az. Ulttyq statistika biýrosy 2024 jyly qazaqstandyqtar 17 mln 47 myń 524 ret kinoǵa barsa, sonyń úshten biri – alty millionǵa jýyǵy otandyq filmderdi tamashalaǵan", -degen depýtat otandyq filmderge suranys bar ekenin aityp, áleýmettik saýalnama boiynsha ulttyq kinony kórgisi keletinderdiń qatary artqanyn jetkizip, memleketten qoldaý qajet ekenin aitty.
Sondyqtan, J. Áshimjanov salaǵa jaýapty ministrlik búkil memleket boiynsha túsiriletin filmderdiń ideologiialyq, tildik, ulttyq ustanymyn retteý tetigin qarastyratyn arnaiy kórkemdik-saraptamalyq keńes qurýqajet dep esepteidi.
Ekinshi, memlekettik tildegi ulttyq filmderdiń úles salmaǵyna basymdyq berip, úshinshi, filmderde memlekettik tildiń normalaryn buzýdy qatań qadaǵalaý qajet ekenin aitady. Sonymen qatar, halyqty arnaiy ulttyq kinolardy kórsetetin kinoteatrlarmen qamtamasyz etý qajet dep esepteidi.
