Elbasy Qazaqstan halqyna arnaǵan Joldaýynda oqýshylardyń júktemesin azaitýdy tapsyrdy. Osydan keiin QR premer-ministri Baqytjan Saǵyntaev Bilim jáne ǵylym ministrligine atalǵan máseleni retteýge tapsyrma berdi. Óz kezeginde atalǵan ministrliktiń jaýapty basshylary oqýshylardyń júktemesiniń qalai azaiatynyn jýrnalisterge túsindirip berdi. Osy tusta "úi tapsyrmasynyń azaiýy bilim sapasyna keri áserin tigizbei me?" degen suraq týyndaidy. Atalǵan máselege qatysty QR Bilim jáne ǵylym ministriniń burynǵy orynbasary, "Nazarbaev Ziiatkerlik mektepteri" DBBU basqarma tóraiymy Kúlásh Shámshidinova pikir bildirdi, dep habarlaidy Baq.kz.
"Bul máselege qatysty jeke pikirimdi bildiremin. Mundai qorqynysh bar. Men "úi tapsyrmasy bolmaidy" degenge óz basym qarsymyn. Biraq úige birden 100 esepti nemese bir kúnde qazaq, orys, aǵylshyn tilderinen «shyǵarma jazyp kel» deýge bolmaidy. Úi tapsyrmasy bolýy qajet jáne bala ony oryndaýy kerek. Alaida onyń kólemin, tapsyrmanyń qalai oryndalý qajettigin muǵalimder ózara kelisip alýy shart. Eger bala oqyǵan dúniesin qaitalap otyrmasa, ol mida qalmaidy. Keiin bala mektepte ótken sabaqty umytyp qalady. Sondyqtan úige tapsyrma bermei qoiýǵa bolmaidy", - dedi ol.
Osy oraida Kúlásh Shámshidinova balalardy jastaiynan eńbekke baýlý qajettigin aitty.
"Men jaqynda Gonkongten oraldym. Onda balalar mektepke tańǵy 8.30-da keledi. Saǵat túski 15:45-te bilim ordasynan shyǵady. Jalpy ol jaqta oqýshylar 7 saǵat 15 minýt mektepte bilim alady. Onyń ishinde 1 saǵat oqýshylar túski asqa shyǵady. Gonkong búginde bilimge baǵa beretin halyqaralyq testilerden aldyńǵy qatarda tur. Bizdiń balalarymyz da mektepte sonsha ýaqyt ótkizedi. Osy oraida men «bul ómirde eshnárse ońai kelmeitinin» aitqym keledi. Maqsatyńa jetýiń úshin eńbektenýiń kerek. Arqań terleýi qajet. Úi tapsyrmasyn oryndaý da eńbek. Biz búginnen bastap, balany eńbektenýge úiretpesek, erteń ol er jetkende óz betimen jumys istep ketpeidi. Sondyqtan oqýshyny mektepten bastap, eńbekke baýlý qajet", - dep túiindedi sózin "Nazarbaev Ziiatkerlik mektepteri" DBBU basqarma tóraiymy.
Eske salaiyq, Bilim jáne ǵylym ministrligi Mektepke deiingi jáne orta bilim departamentiniń direktory Sholpan Qarynova oqýshylarǵa túsetin júktemeniń qalai jeńildetiletinin aityp bergen edi.
"BǴM buiryǵy boiynsha, búgin oqýshylardyń úi tapsyrmasy 150 minýttan aspaityn boldy. Sonymen qatar, demalys kúnderi men mereke kúnderine kórkem mátinder men ǵylymi jobalardy oryndaýdan ózge úi tapsyrmasy berilmeidi", - deidi departament basshysy úkimet úiindegi baspasóz máslihatynda.
