Jambyl oblysynyń ákimi Berdibek Saparbaev belgili aqyn, Memlekettik syilyqtyń laýreaty Kúlásh Ahmetovanyń shańyraǵynda bolyp, jaqynda jaryq kórgen aqynnyń bes tomdyq jinaǵynyń tusaýyn kesti, dep habarlaidy "Ult aqparat".
Qazaqtyń aiaýly aqyny Kúlásh Ahmetova biyl 75 jasqa tolady.
Sanaly ǵumyryn qasterli poeziiaǵa arnaǵan aqyn qazaq ádebietin taǵy da óziniń injý-marjanymen tolyqtyrdy.
Onyń bul qýanyshyna oblys ákimi Berdibek Mashbekuly ortaqtasyp, Kúlásh Ahmetova men jary Qaiyrbek Asanovtyń shańyraǵyna arnaiy atbasyn burdy.
«Ultty tanytatyn ádebiet pen óner. Ádebiet te, óner de máńgilik jasai beredi. Ákimder qyzmetke keledi, ketedi. Al aqynnyń murasy ómir baqi qalady. 14 jasynda jyr jazý degen árkimniń basyna berile bermeitin baq. Siz sol Ulbike apamyzdyń jolyn jalǵastyryp, osyndai ádebi muralardy basyp shyǵardyńyz. Sizdi «qazaq poeziiasynyń aq gúli» dep el beker aitqan joq. Bes kitapqa Ábdildá Tájibaev aǵamyzdan bastap, Ábish Kekilbaev, Qadyr Myrza Álilerdiń alǵysóz jazýy tegin emes. Bul - Sizdiń óleńderińizdiń qundylyǵy, ásirese qazirgi zamanǵa kerek ekendiginiń nyshany. Otandy qalai súiý kerek, qalai taza eńbek etý kerek, sonyń barlyǵy jyrlaryńyzda tunyp tur. Mahabbat degen tek qana adam men adamnyń arasynda ǵana emes ekenin, ultyna, Otanyna, jerine degen mahabbatty jaqsy jazǵansyz. Sizdiń jolyńyz jastarǵa ónege bolýy kerek. Siz shyǵarmashylyǵyńyzǵa arqaý etken adaldyq, shyndyq, ultty súiý árbir urpaqqa úlken perzenttik paryz», - degen Berdibek Mashbekuly izgi tilegin bildirdi.
Kúlásh Ahmetova aldaǵy ýaqytta Otan jaily kitap shyǵarýdy josparlap otyrǵanyn tilge tiek etti.
«Sizge arnaǵan óleńimniń bir jolynda: «Sen júgirseń elge qarai júgirdiń, Sen júginseń ádiletke júgindiń, Sen halyqtyń tóbesinen qaramai, Sen halyqtyń júregine úńildiń» degenimdei árdaiym halyqpen birge ekenińizdi kórip júrmiz. Ony ózińiz ilkimdi istermen dáleldep kelesiz. Aldaǵy ýaqytta Otan degen kitap shyǵaraiyn dep jatyr edim. Oǵan ózimniń tabanym tigen elimizdiń ár óńiri, iaǵni Qazaqstannyń tabiǵaty jaily jyrlarym enedi. Siz sekildi ádebiet jaily sóileý árbir ákimniń qolynan kelmeidi. Sondyqtan sol kitabyma ózińiz alǵysóz jazyp berseńiz», – degen usynysyn jetkizdi.
Oblys ákimi Berdibek Saparbaev pen jazýshy-dramatýrg Elen Álimjan jańa jinaqtyń tusaýyn kesken soń, jas aqyndar óleń oqydy.
