Mamandar qulaǵan «Soiýz» zymyranynyń baspaldaqtaryn tapty, dep habarlaidy "Ult aqparat" QR IIM TJK baspasóz qyzmetine silteme jasap.
«Búgin kúndiz Jezqazǵan qalasynda ornalasqan №1 Resei bazasynyń jáne quraldarynyń kúshimen ǵarysh kemesiniń baspaldaqtary tabyldy», - delingen habarlamada.
TJK málimetine sáikes, birinshi, ekinshi, úshinshi baspaldaq, sonymen qatar apattyq qutqarý júiesiniń qozǵaltqysh qurylǵysy Qaraǵandy oblysy Ulytaý aýdany Talap aýylynan 40 shaqyrym jerden tabylǵan.
«Zymyran-tasyǵyshtyń fragmentteriniń qulaǵan aýmaǵynda dala nemese orman órtteri, zardap shekkender joq», - delingen Komitettiń habarlamasynda.
Aita keteiik, keshe 14 saǵat 40 minýt 15 sekýndta Baiqońyr ǵarysh ailaǵynyń Gagarin start alańynan orbitaǵa basqarylatyn kóliktik «Soiýz MS-10» kemesin alyp shyǵýy tiis «Soiýz FG» zymyran tasyǵyshy ushyryldy. Biraq start berilgen soń birneshe minýttan keiin Roskosmos saityndaǵy tikelei kórsetilim úzilip, diktor «zymyran tasyǵyshtyń apatqa ushyraǵanyn» habarlaǵan edi.
Sol kúni tús aýa QR IIM Tótenshe jaǵdailar komitetiniń tóraǵasy Vladimir Bekker ǵaryshkerlerdiń din-aman tabylǵanyn, ekinshi satysy Jezqazǵannan 30-35 shaqyrym jerge qulaýy múmkin ekenin aitqan edi.
Sonymen qatar ol Ǵarysh kemesi apatyn Qazaqstan men Reseidiń úkimetaralyq komissiiasy tekseretindigin atap ótti.
