Ishki ister ministrliginiń resmi ókili Nurdildá Oraz eldiń birneshe óńirinde júrip jatqan «Quqyqtyq tártip» is-sharasy aiasynda politsiia ókilderi qandai áreketke barýǵa quqyly ekenin túsindirdi, dep habarlaidy QazAqparat.
«Óńirlerde ishki ister organdary «Quqyqtyq tártip» jedel-aldyn alý is-sharasyn ótkizip jatqanyn eske salamyn. Onyń negizgi maqsaty – óńirdegi jedel jaǵdaidy saýyqtyrý, zańdylyq pen quqyqtyq tártipti, qaýipsizdikti qamtamasyz etý», - dedi Nurdildá Oraz.
Atalmysh is-shara aiasynda politsiia qyzmetkerleri mynadai áreketter oryndai alady:
- kólik quralynyń jáne jeke basty kýálandyratyn qujattardy tekserý, kólikti tintý jáne azamattardyń zattaryn tekserý;
- jalǵa alynǵan páterlerdi, iesiz úilerdi, hostelderdi, saiajailardy, bazarlardy, tehnikalyq qyzmet kórsetý stantsiialaryn, sharýa qojalyqtaryn, shalǵaidaǵy ýchaskelerdi, qystaqtardy jáne basqa da shalǵai jerlerdi tekserý;
- atys, travmatikalyq jáne sýyq qarýdy, oq-dárilerdi, jarylǵysh zattardy tárkileý;
- turaqty turǵylyqty jeri joq adamdardy, zańsyz kóship-qonýshylardy anyqtaý;
- buryn sottalǵan jáne ishki ister organdarynda esepte turǵan ózge de adamdardy tekserý.
«IIM azamattardy jedel-profilaktikalyq is-sharalarǵa túsinistikpen qaraýǵa shaqyrady», -dedi ministrliktiń resmi ókili.
