Qazaqstan Respýblikasy Ortalyq sailaý komissiiasy sailaýshylarǵa úndeý joldady, dep habarlaidy "Ult aqparat".
Eske sala keteiik, 2021 jylǵy 10 qańtarda Qazaqstan Respýblikasy Parlamenti Májilisiniń jáne máslihat depýtattarynyń kezekti sailaýy ótedi.
«Eger siz daýys berý kúninde 18 jasqa tolǵan jáne belsendi sailaý quqyǵyna ie Qazaqstan Respýblikasynyń azamaty bolsańyz, Qazaqstan Respýblikasy Parlamenti Májilisiniń jáne máslihat depýtattaryn sailaýǵa quqyǵyńyz bar. Sizdiń sailaýshylar tiziminde bolýyńyz - sailaýǵa qatysýǵa konstitýtsiialyq quqyǵyńyzdyń iske asyrylýynyń kepili. Sailaýshylar tizimin jergilikti atqarýshy organdar jasaidy. Sizdiń naqty sailaý ýchaskesiniń aýmaǵyndaǵy turǵylyqty jerińiz boiynsha tirkelýińiz sizdi sailaýshylar tizimine engizýge negiz bolyp tabylady. Sailaý ýchaskeleriniń shekarasy jergilikti buqaralyq aqparat quraldarynda 2020 jylǵy 5 qarashadan keshiktirilmei jariialanady» delingen OSK úndeýinde.
Ortalyq sailaý komissiiasynyń málimetine sensek, ár sailaýshy sailaý taǵaiyndalǵan kezden bastap tiisti jergilikti atqarýshy organda sailaýshy retinde tirkelýge quqyly.
«Sizge 2020 jylǵy 10 jeltoqsanǵa deiin sailaý kúni tirkelgen jerińiz boiynsha daýys berýge arnalǵan úi-jaiǵa kelý múmkindigińiz bolmaityny belgili bolsa, baratyn jerińizdegi ákimdikke sailaýshylardyń tiisti tizimine qosý týraly jazbasha ótinishpen júginýge quqylysyz. Eger siz turaqty tirkelgen jerińizden tys eldi mekende bolsańyz jáne turǵylyqty jerińiz boiynsha ýaqytsha tirkelgen bolsańyz, 2020 jylǵy 10 jeltoqsannan keshiktirmei, sailaý kúni ózińiz daýys beretin sailaý ýchaskesiniń sailaýshylar tizimine engizý týraly jazbasha ótinishpen ýaqytsha bolatyn jerdegi ákimdikke júginýge quqylysyz» deidi komissiia.
Sondai-aq, ortalyq sailaý komissiiasy ár sailaýshyny quqyqtyq saýattylyq tanytyp, sailaý quqyǵyn paidalanýǵa shaqyrady.
«Ózińizdi sailaýshylar tizimine engizý boiynsha zańdy mańyzdy áreketterdi ýaqtyly qabyldaýyńyz qajet. 2020 jylǵy 26 jeltoqsannan bastap sizge óz sailaý ýchaskeńizdegi sailaýshylar tiziminen ózińiz týraly derekterdi tekserý múmkindigi beriledi» dep túiindeidi úndeýin ortalyq sailaý komissiiasy.
