Quqyq qorǵaý organdarynyń qyzmetkerleri men sýdialar sybailas jemqorlyq qylmystary úshin qatań jaýapkershilikke tartylýy tiis. Bul týraly QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev Facebook paraqshasynda jazdy, dep habarlaidy "Ult aqparat".
«Halyq únine qulaq asatyn memleket» tujyrymdamasyn dáiekti iske asyrý sybailas jemqorlyqqa qarsy jumysty jandandyrdy. Koronavirýs indeti is júzinde memlekettik basqarýdyń ártúrli salalaryndaǵy, atap aitqanda densaýlyq saqtaý salasynan bastap tsifrlandyrýǵa deiin sozylmaly sybailas jemqorlyq «indetteriniń» betin ashty. Sondyqtan Memleket basshysy biyl 19 tamyzda Qazaqstannyń sybailas jemqorlyqqa qarsy saiasatyn odan ári jańǵyrtý jóninde arnaiy keńes ótkizdi. Onyń negizgi tezisteri keshegi Joldaýdyń jeke blogyna kirdi», - dedi ol.
Osy rette agenttik basshysy Prezidenttiń sybailas jemqorlyqqa qarsy reformalary úshinshi paketiniń asa mańyzdy bastamalaryna qysqasha toqtaldy.
«Birinshiden – sybailas jemqorlyq úshin jaýapkershilikti kúsheitý. Eń aldymen, bul – quqyq qorǵaý organdarynyń qyzmetkerleri men sýdialarǵa qatysty. Meniń oiymsha, olar zańdylyq pen quqyqtyq tártipti saqtai otyryp, sybailas jemqorlyq qylmystary úshin qatań jaýapkershilikke tartylýy tiis. Para berýshiler men deldaldar úshin paraqorlyq jazasyn qatańdatý máselesi pysyqtalady. Sottalǵan jemqorlarǵa qatysty merziminen buryn shartty túrde bosatýdyń kúshin joiý eń qýatty profilaktikalyq áserge ie bolady. Osy tájiribeniń jalǵasy retinde biz asa aýyr sybailas jemqorlyq qylmystary úshin birneshe eselengen aiyppul qoldanýdy jáne jemqorlarǵa koloniia-qonystarda taǵaiyndalǵan jazany qaita qaraýdy joiýdy jaqtaimyz», - dedi Alik Shpekbaev.
Onyń atap ótýinshe, ekinshiden – 2021 jyldan bastap memlekettik qyzmetshiler, depýtattar men sýdialar úshin shetelde bank shottaryn ielenýge tyiym salýdy engizý. Bul bastama el múddesi úshin qyzmet etý ideologiiasy turǵysynan ǵana emes, jemqorlyq kapitalyn shetelge shyǵarý múmkindikterin joiý maqsatynda da mańyzdy.
«Úshinshiden – meniń oiymsha, «Qoǵamdyq baqylaý týraly» Zańnyń qabyldanýy azamattar men úkimettik emes uiymdardy sybailas jemqorlyq pen biýrokratiiaǵa qarsy júieli túrde áreket etýge barynsha keń aýqymda tartýǵa naqty serpin beredi. Onda san qyrly máseleler boiynsha qoǵam ókilderiniń memlekettik organdarmen ózara árekettesýdiń naqty tetikteri kórinis tabatyn bolady. Antikor ázirlegen Ashyq biýdjetterdiń interaktivti kartasy memlekettik organdardyń ashyqtyǵyn qamtamasyz etýdiń negizgi quraly bolý arqyly alǵa qadam baspaq. Budan basqa, memlekettik organdardyń janynda ǵana emes, ulttyq kompaniialarda da jumys isteitin qoǵamdyq keńesterdiń róli edáýir kúsheietin bolady. Úzdik sheteldik tájiribeler negizinde sybailas jemqorlyq faktileri týraly aqparat berýshilerdi qorǵaýdyń keshendi júiesin ázirleý azamattyq qoǵamdy jandandyrýdyń mańyzdy quraly bolmaq», - dedi agenttik tóraǵasy.
