Almatyda óz kúieýin óltirip, órtegen áieldiń týystary alǵash ret el aldyna shyqty, dep habarlaidy ult.kz.
Kúdiktiniń sińlisi Rýslan Ótepbaiǵa suhbat bergen. Ol óz sózinde ápkesiniń óz jazasyn alýyna qarsy emes ekenin aitty.
“Ózimniń oiym, ár adam jasaǵan qylmysynyń jazasyn alýy kerek. Men bul jerde balalardy oilaimyn. Olardyń bolashaǵy ne bolady dep. Ápkem qoryqqannan máiitti Kegenge aparyp órtegen. Endi ol balalarymdy arashalap qalyńdarshy dep otyr”, - dedi kúdiktiniń sińlisi.
Aita keteiik, Almaty oblysynyń Kegen aýdanynda politsiia qyzmetkeriniń órtengen máiitiniń tabylýy qoǵamda úlken rezonans týdyrdy. Qaiǵyly oqiǵaǵa bailanysty adam óltirý faktisi boiynsha qylmystyq is qozǵalyp, birneshe kúdikti ustaldy.
Aldyn ala málimetke sáikes, marqum – Almaty qalasy Áýezov aýdandyq politsiia basqarmasynda qyzmet etken 37 jastaǵy Aslan Álserov. Onyń órtengen máiiti 23 maýsym kúni Kegen aýdanyndaǵy taýly aimaqtan tabylǵan. Bul týraly habarlama túskennen keiin oqiǵa ornyna jedel-tergeý toby jiberilgen.
Almaty oblystyq politsiia departamenti qaza bolǵan adamnyń politsiia qyzmetkeri ekenin rastady. Jedel-izdestirý sharalary barysynda kúdikti retinde marqumnyń jubaiy, kámeletke tolmaǵan uly jáne taǵy birneshe adam ustalyp, ýaqytsha ustaý izoliatoryna qamaldy.
Quqyq qorǵaý organdarynyń málimetinshe, qylmystyq is adamdar tobynyń aldyn ala sóz bailasýymen jáne erekshe qatygezdikpen jasalǵan adam óltirý baby boiynsha tergelip jatyr. Tergeý múddesine bailanysty ózge aqparat ázirge jariialanbaidy.
Jelide taraǵan málimetterge sáikes, Aslan Álserov jubaiymen 15 jyldan astam ýaqyt birge turǵan. Olar jeti bala tárbielep otyrǵan kópbalaly otbasy retinde tanylǵan jáne buǵan deiin úlgili januia retinde birneshe ret kópshilikke tanystyrylǵan. Alaida bul aqparatty tergeý organdary resmi túrde rastaǵan joq.
Qazirgi ýaqytta tergeýshiler oqiǵanyń barlyq mán-jaiyn anyqtap jatyr. Quqyq qorǵaý organdary istiń tolyq ári jan-jaqty zertteletinin málimdedi.
