Belgili sportshy Qýat Hamitov instagram paraqshasy arqyly Prezident Qasym-Jomart Toqaevqa júginip, politsiia qyzmetkerleriniń beibereket áreketin shekteýdi surady, dep habarlaidy ulysmedia.kz portaly.
«Búgin Prezidentke júginip, odan elde bolyp jatqan beibereket áreketterdiń toqtaýyn suraimyn. Naqty neni? Komendanttyq saǵatty jáne «terrorizm» degenmen kúresti. Sebebi men halyqtyń ishinde terroristerdiń joqtyǵyn bilemin. Qazir erkindik alǵan quqyq qorǵaýshylar shekten shyǵyp ketti. Olar mitingterge qatyspaǵan adamdardy alyp ketedi, olardy sabaidy, esh túsindirmeidi. Jasamaǵan qylmysyn moiyndatady. Bilemin, onda túskender qalasa da, qalamasa da moinyna barlyǵyn ala beredi. Sondyqtan Prezidentten osy jaǵdaidy toqtatýdy suraimyn», - deidi ol.
Sportshy ózine kúnine myńdaǵan habarlama kelip túsip jatqanyn aitady. Olardyń kóbi baýyryn nemese ákesin politsiia qyzmetkerleri sebepsiz alyp ketetinin aityp, shaǵymdanǵan.
«Jap-jas balany, otbasy múshelerin atyp ketkeni týraly aqparattardy kórip jatyrmyz. Nege osyny istegenderdi sottamaidy? Olar nege jazasyz qalady? Terrorizm demeske amal bar ma bul jaǵdailardy?» - deidi sportshy.
Sportshy sonymen qatar miting kúni kóp adam aýrýhanaǵa túskenin, sol jerden kóbi týystaryna sońǵy ret habarlasqanyn aitady. Endi solardyń týystary jaqynyn tappai, alańdap otyr.
Qýat Hamitov sóz sońynda osy beibereketsizdikten keiin politsiia departamentiniń basshysy nelikten óz laýazymynda qalǵanyn túsinbeitinin málim etti.
Aita ketsek, beibit mitingke shyǵyp, jańaózendikterdi qoldaýǵa shyqqan Qýat Hamitovtyń ózi de soqqyǵa jyǵylǵanyn, sonyń saldarynan sporttyq mansabyn aiaqtaitynyn buǵan deiin habarlaǵan edi.
