Prezident janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń kezekti otyrysynda belgili sarapshy Nazym Janǵazinova mass-media jáne kommýnikatsiia salasyndaǵy máselelerge toqtaldy.
"Bizder elimiz úshin kúrdeli kezeńde kezdesip otyrmyz. Jyldamdyq ómirdiń barlyq salasynda artyp barady. Qazir kez kelgen ózgeris azamattardyń kóńil-kúiine, qaltasyna birden áser etedi. Bala kezimizde - birjadaǵy jańalyqtan soń ómiri birden ózgeretin adamdar týraly kinodan kóretinbiz. Qazir ózimiz sondaimyz. Aqorda, Ulttyq bank, ministrlik, iri kompaniialar, tanymal adamdar qoǵamdaǵy kóńil kúi men pikirdi bir mezette ózgertetinin kúnde kórip júrmiz" - dedi Nazym Janǵazinova.
Osy oraida, ol mass-media jáne kommýnikatsiia salasynyń ókili retinde keibir trendter men jalpy ahýalǵa toqtalyp ótti.
"Birinshiden, óte jaqsy trend - joǵary bilik azamatqa kórermen, tyńdarman, oqyrman retinde nazar aýdaryp otyr.
Shyny kerek, buryn azamat tek salyq tóleýshi, jumysy bar ne jumyssyz birlik boldy. Al qazir jaǵdaidyń ózgergenine Prezidenttiń sózderi kýá. Túrkistanda ótken Quryltaida sóilegen sózinde, Prezident mass-media salasyn derbes tarmaq retinde atap ótti. Media qaýymdastyq sol tarmaqtaǵy sózderge qyzý qoldaý bildirip otyr. Sebebi, zamanaýi adamnyń nazaryn aýdartatyn eń utymdy ádis - mýltimedia. Búgingi tolqyn kózben oilanatyn urpaq ekenin esepke alý kerek. Sondyqtan Prezidenttiń kreativti indýstriiany erekshe atap, nazar aýdarýy - der kezindegi málimdeme bolyp otyr.
Ekinshiden, mass-mediadaǵy jalpy ahýalǵa toqtalsam.
Men úshin qýanyshty trendterdiń biri - ana tilimizdegi resýrstardyń kóbeiýi. Qazir eki kúnniń birinde buryn kórmegen qazaq tilindegi resýrstyń siltemesin kórip qalamyn. Qazaqsha saraptama da kóbeiip keledi. Youtube-te de ana tilimizdegi kontent jii trendke shyǵyp júr. Tilimizdiń mártebesi kóz aldymyzda ósip jatqany qýanyshty.
Degenmen, álemdik mediaǵa tán teris kórinisterdiń baryn da aitý kerek. Klikbeit, birjaqty aqparat, tekserilmegen faktiler bizde de barshylyq" - dedi spiker.
Onyń aitýynsha, qazir adamdy it qapqany jańalyq emes, adamnyń itti qapqany jańalyq. Mundai ustanym oqiǵanyń basty aktsentin burmalap júr.
"Alysqa barmai-aq, kúni keshe bolǵan oqiǵalardy saralaiyq. Abai oblysyndaǵy órt, nemese bankte bolǵan oqiǵalarda resmi málimetter jeke azamattardyń habarynyń astynda kómilip qaldy. Biz resmi organdardyń habarynan buryn, azamattardyń jeke kózqarasyna negizdelgen habarlardy, messendjerlerde qoldan qolǵa kóshken sózderdi kóp oqydyq. Olardyń barlyǵyn qisyndy, saýatty deýge bolmaidy. Ásirese, infliýenserlerdiń jaýapkershilik máselesi aiqyn kórindi.
Bizdi osy jaýapkershilik baǵytynda kóp jumys kútip tur. Jaqsy jańalyq - jaýapkershilik degenimiz repressiia, shekteý degen uǵymnyń eskirý tendentsiiasy bar. Keshegi Quryltaida Prezident te jumsaq kúshke - soft power-ge toqtalyp ótti. Jazalaityn zańdar arqyly emes, bilmegen jerin túsindirý, jeke ónege arqyly jaýapkershilik qalyptastyrý - keremet strategiia. Prezidentimizdiń jumsaq kúsh týraly sózi memorgandar men azamattardyń qarym-qatynasyndaǵy renessansqa túrtki bolady dep sengim keledi.
Azamattarymyz tek - oqýshy, stýdent, jaýynger, jumysshy siiaqty áleýmettik birlik emes, sonymen birge - kórermen, tyńdarman, oqyrman retinde qarala bastaýy jaqsy jańalyq. Kreativti indýstriiaǵa betburysty qoldai otyryp, elimizdiń mass-mediasy aitary bar izgi nietti jandardyń minberine ainalsyn dep tileimin. Qazaqsha kontent kóbeie bersin!" - dep túiindedi ol óz sózin.
