Foto: videodan kadr
Qaznette azamattyq jubaiyn óltirgeni úshin 24 jylǵa sottalǵan Qýandyq Bishimbaev tiisti jazasyn ótep jatqan joq, tipti qashyp ketken bolýy múmkin degen aqparat tarady, dep habarlaidy Ult.kz.
Eks-ministrdiń «joǵalyp ketkeni» týraly alǵash AIRAN aqparat resýrsynyń jýrnalisteri habarlady. Olardyń dereginshe, sottan keiin Bishimbaev Arshaly aýylynyń mańyndaǵy koloniiaǵa jiberilýi kerek bolǵan. Alaida koloniiaǵa barǵan túsirilim toby Bishimbaevty ol jerden tappaǵan.
Bul aqparattan keiin áleýmettik jelilerde qyzý talqy bolyp, eks-sheneýniktiń bos júrgeni, tipti shetelge qashyp ketkeni týraly qaýesetter tarai bastady. Alaida QAJK (Qylmystyq-atqarý júiesi komiteti) sottalýshynyń qashyp ketkeni týraly málimetti joqqa shyǵardy.
«Bul sottalýshy jazasyn barynsha qatań rejimdegi mekemede ótep jatyr. Jalǵan aqparattyń taralýyna bailanysty qylmystyq is qozǵalyp, kináliler jaýapkershilikke tartylady», – dep málimdedi QAJK ókilderi.
Endeshe, Bishimbaev Arshalyda bolmasa, qaida degen suraq týyndaidy.
Bul suraqqa ózin quqyq qorǵaýshy jáne jumys barysymen jazasyn óteý oryndarynda jii bolatyn Baýrjan Mýsin "Orda.kz" basylymyna jaýap berdi. Ol Qýandyq Bishimbaevtyń Arshaly túrmesinde bir kún de otyrmaǵanyn aitty.
«Ol Stepnogorskidegi №5 mekemede, tórtinshi otriadta otyr. Bizdiń elde jazasyn óteý ornyn tańdaý bólmelerdiń toltyrylýyna qarai da jasalady. Adamnyń qaida otyratyny tek týystaryna ǵana aitylady. QAJK muny jurtshylyqqa habarlaýǵa mindetti emes», – dedi Mýsin.
Keibir derekkózder jalǵan aqparat taratý faktisi boiynsha qylmystyq is qozǵalǵanyn habarlaýda. Biraq resmi derekkózder ázirge muny rastamady.
