Qýańshylyq kezinde qurǵaqshylyqtan zardap shekken óńirlerge shóp jetkizgen Qurmet Talapqazyǵa jańa úi berildi, dep habarlaidy QazAqparat.
Shymkenttegi Soltústik saiajai móltek aýdanynda ornalasqan úide barlyq jaǵdai jasalǵan. Tabiǵi gaz qosylyp, aýyz sý júiesi tartylǵan. Qoǵamdyq kólikte dál úidiń irgesinen júrip jatyr.
«Qurmet Talapqazy «Qurmet» gramotasyna laiyq edi» degen áleýmettik jelide pikir kóbeiip ketti. Kópshilik «Halyq bolyp baspana syilaiyq» degen oilardy da aitty. Tipti ol pikirlerge meni belgilep jazyp jatty. Sondyqtan táýekel etip bastap kettik. Eki kúnde 9 mln teńgeden astam qarajat jinaldy. Belgili metsanant Dýlat Tastekeev «qansha jinaisyńdar sonsha qarajat qosyp beremin» degen ýádesi bar edi. Jalpy 19 mln-dai qarajatqa úi aldyq», - dedi jýrnalist Maqsat Tolyqbai.
Búgin Qurmet jańa úiinde qurbandyq shalyp, quran oqytty. Jańa jyldan keiin Shymkenttegi oqýynda tegin jalǵastyrady. Endigi maqsaty - Altaidyń ar jaǵyndaǵy áke-sheshesi men baýyrlaryn elge kóshirip alyp kelý.
«Halyqqa rahmetimdi aitamyn. Jinalǵan aqshany qaiyrymdylyqqa jumsamaqshy edim, qarajatty qolyma bermei, úi alyp berdi. Igi iske uiytqy bolǵan Maqsat Tolyqbai, Dýlat Tastekeev aǵama jáne barsha halyqqa rahmetimdi aitamyn. Aldaǵy ýaqytta otbasymdy alyp kelip, mal sharýashylyǵymen jáne saýdamen ainalyssam degen oiym bar» - deidi Qurmet.
Eske salsaq, Shymkent qalasynyń 25 jastaǵy turǵyny Qurmet Talapqazy elimizdiń batysyndaǵy qýańshylyqqa tap bolǵan maldy aýyldarǵa jem-shóp jiberý úshin búkil jumysyn tastap, qoǵamdyq bastamaǵa muryndyq bolǵan edi.
Keiin onyń bastamasyna Aýyl sharýashylyǵy ministrligi qulaq asyp, «Qazaqstan temir joly» ulttyq kompaniiasyn kómekke tartqan bolatyn. Sondai-aq oǵan Shymkenttegi ýniversitette tegin oqý múmkindigi berildi. Sondai-aq, Aýyl sharýashylyǵy ministri gramota tabystady.
