Foto: © Sputnik / Tomas Thaitsýk
Qazaqstanda qorǵalýǵa quqyǵy bar kýágerdiń jaýabyn dálel retinde paidalanýǵa tyiym salý usynyldy. Tiisti ózgeris keibir zańnamalyq aktilerge Qylmystyq, Qylmystyq-protsestik jáne Qylmystyq-atqarý kodeksterin ońtailandyrý máseleleri boiynsha ózgerister engizý týraly zań jobasynda qarastyrylǵan, dep habarlaidy Sputnik Qazaqstan.
Ádilet vitse-ministri Alma Muqanovanyń aitýynsha, qazir kóbinese qorǵalýǵa quqyǵy bar kýágerler keiinnen is boiynsha kúdikti dep tanylyp jatady.
"Mundai jaǵdaida buryn "qorǵalýǵa quqyǵy bar kýáger" mártebesinde bolǵan adamnyń quqyqtary buzylady. Óitkeni kúdiktiden aiyrmashylyǵy, onyń jaýaptary qylmystyq protseste dálel retinde paidalanylýy múmkin ekendigi túsindirilmeidi. Osyǵan bailanysty buryn "qorǵalýǵa quqyǵy bar kýá" retinde bolǵan adamnyń aiǵaqtaryn dálel retinde paidalanýǵa tyiym salýdy engizý usynylyp otyr", - dedi Muqanova ortalyq kommýnikatsiialar qyzmetinde ótken baspasóz máslihatynda.
Sondai-aq qorǵalýǵa quqyǵy bar kýágerge saraptama taǵaiyndalǵan jáne júrgizilgen jaǵdaida sarapshyǵa qosymsha suraqtar qoiý quqyǵyn berý kózdelýde.
"Qorǵalýǵa quqyǵy bar kýágerdiń is júzinde keiinnen kúdikti dep tanylatynyn eskere otyryp, oǵan sot saraptamasyn júrgizý bóliginde de osyndai quqyqtar berý qajet", - dep sanaidy vitse-ministr.
Budan bólek adamdy jetkizý ýaqyty men negizderin mindetti túrde kórsetýdi belgileý usynyldy.
Muqanovanyń aitýynsha, jetkizý – adamnyń qylmystyq quqyqbuzýshylyqqa qatystylyǵyn anyqtaý maqsatynda 3 saǵattan aspaityn merzimge qoldanylatyn protsestik májbúrleý sharasy.
"Jetkizý merzimi aiaqtalǵannan keiin adamǵa, ony keiinnen protsestik ustaý jaǵdailaryn qospaǵanda, jetkizý týraly anyqtama dereý beriledi. Alaida mundai anyqtama is júzinde azamattardy negizsiz májbúrleý sharalarynan qorǵamaidy. Osyǵan bailanysty anyqtamada jetkizýdiń negizi men ýaqytyn mindetti túrde kórsetý usynylady. Bul adamnyń bostandyǵyn zańsyz shekteý faktilerin boldyrmaýǵa múmkindik beredi jáne onyń quqyqtaryn is júrgizý arqyly qorǵaýǵa kepildik beredi", - dep túiindedi sózin Muqanova.
