Almaty oblysynyń Sarqan aýdanynda bes jastaǵy qyz balanyń denesin qoqystan tapqan kýáger oqiǵanyń qalai bolǵanyn aitty, dep habarlaidy QazAqparat agenttigi.
Bas kiim kigen kishkentai balanyń basy qoqysta jatqanyn sarqandyq turǵyn Mádi Muhametqalievtiń balalary kóripti. Ákesi balalarynan sumdyq jaitty estip, dereý oqiǵa ornyna barǵan. Politsiiany shaqyrtqan.
«Osydan eki kún buryn, iaǵni 17 mamyr kúni túski saǵat 11:00 shamasynda úide demalyp jatqanmyn. Ulym kelip «Áke, áke! Ana jerde náresteniń súiegi jatyr. Kórińizshi, kórińizshi?» deidi. Kelsem, týra osy qoqystyń janynda balanyń bas súiegi jatyr. Eti aǵyp ketken. Denesi tómende jatyr eken. Basy bir bólek, denesi bir bólek jatty», - dedi Mádi Muhametqaliev QazAqparat tilshisine bergen suhbatynda.
Mádi Muhametqaliev oqiǵanyń ótkenine eki kún bolsa da áli óz-ózine kele almai júrgenin aitady.
«Janýar da óz balasyn qorǵaidy, mynaý endi sumdyq qoi. Balanyń óli denesi qoqysta jatyr. Áli durystap tamaq ishe almai júrmin. Ózim de bala ósirip otyrmyn. Bala kiimimen jatty», - dedi Mádi Muhametqaliev.
Esterińizge sala keteiik, buǵan deiin Almaty oblysy Sarqan aýdanynda bes jastaǵy balanyń máiiti qoqystan tabylǵanyn habarlaǵan bolatynbyz.
Quzyrly organnyń aqparatyna sáikes, búgin balanyń anasy anyqtaldy. Ol 2002 jyly týǵan Sarqan qalasynyń turǵyny bolyp shyqty. Balasyn 2017 jyly, iaǵni 15 jasynda dúniege ákelgen.
