Almatyda Tóle bi kóshesi men Abylai han dańǵyly qiylysynda eki avtobýs soqtyǵysty. Kýáger oqiǵadan keiingi jaitty aityp berdi, - dep habarlaidy Tengrinews.kz agenttigi.
Aty-jónin jasyrýdy suraǵan kýáger kóshe qiylysyndaǵy jaiaý júrginshiler ótkelinen ótkennen keiin birneshe sekýndtan soń avtobýstar soqtyǵysqanyn aitty.
"Burylyp qaraǵanda, avtobýstar dál artymyzdaǵy ótkelde aǵashtarǵa qalai soǵylǵanyn kórdik. Dóńgelek astynda máiit jatty. Jaiaý júrginshiler ótkelindegi adamdar kóbirek zardap shekti, olar jan-jaqa ushyp ketti deýge bolady. Avtobýstardan jolaýshylar ózderi shyqty, jaralanǵan, biraq qozǵala alatyn jaǵdaida. Júrgizýshilerdiń biri avtobýsta qalyp qoidy", - dedi oqiǵa kýágeri.
Jol-kólik oqiǵasy kýágeriniń aitýynsha, apat kezinde adamdar zardap shekkenderge kómekke umtylǵan. Jedel járdem shaqyrylyp, alǵashqylary bes minýttyń ishinde oqiǵa ornyna jetken. Oqiǵa kýágerleri dárigerler kelgenshe zardap shekkenderge qoldan kelgenshe kómektesýge tyrysqan.
Bul rette Almaty politsiiasy jol apatynan qaza tapqan adam jaiaý júrginshi ekenin rastady.
Eske salaiyq, jol apaty Tóle bi kóshesi men Abylai han dańǵylynyń qiylysynda boldy. Apat saldarynan bir adam qaza taýyp, 17 adam aýrýhanaǵa jetkizilgen.
