Bas kólik prokýratýrasy "Qazaqstan temir joly" ulttyq kompaniiasy óziniń ústem monopoliialyq jaǵdaiyn teris paidalanǵanyn málimdedi, dep habarlaidy Sputnik Qazaqstan.
"Jyl basynan beri Bas kólik prokýratýrasy normativtik aktilerdiń kúshin joiý arqyly 9 myńnan astam kásipkerdiń quqyǵyn qorǵady. Máselen, taldaý júrgizý barysynda "Qazaqstan temir joly" ulttyq kompaniiasy" aktsionerlik qoǵamy óziniń ústem monopoliialyq jaǵdaiyn teris paidalanǵany anyqtaldy. QTJ júkterdi tranzittik tasymaldaýǵa tólem koeffitsientin 30 protsentke tómendetetin arnaiy tariftik sharttardy qoldanady", - delingen prokýratýranyń resmi saitynda jariialanǵan habarlamada.
Kólik prokýratýrasynyń málimetinshe, tarifterdiń negizdiligin zerdeleý kezinde QTJ kompaniialar tobyna kiretin uiymdar úshin birinshi tasymal júzege asyrylǵan sátten bastap tómendetetin koeffitsient qoldanylǵany anyqtalǵan. Al basqa kásipkerlik sýbektilerine (tasymaldaýshylarǵa) qatysty mundai jeńildikter jyl sońynda tasymaldyń kepildendirilgen kólemi oryndalǵannan keiin ǵana berilgen.
"Árkelki sharttardiń nátijesinde QTJ kompaniialar tobyna kiretin uiymdar basqa tasymaldaýshylardyń aldynda artyqshylyqqa ie bolǵan", - dep tolyqtyrdy qadaǵalaý organy.
Bas kólik prokýratýrasynyń narazylyǵynan keiin bul zań buzýshylyq Tranzittik júkterdi tasymaldaý qaǵidalaryna ózgerister engizý arqyly joiyldy.
