28 sáýirde 2016-2020 jyldarǵa arnalǵan Jekeshelendirýdiń keshendi josparyna sáikes Almatyda Investorlar kúni ótkizildi, dep habarlaidy "Ult aqparat" «Qazaqstan temir joly» UK» AQ baspasóz qyzmetine silteme jasap.
Sharaǵa «Qazaqstan temir joly» UK» AQ basshysy Qanat Alpysbaev qatysyp, sóz sóiledi.
Q. Alpysbaevtyń aitýynsha, biylǵy Joldaýda biznes ortany barynsha túbegeili jaqsartý týraly tapsyrma berildi. Osy maqsatta «QTJ» UK» AQ kompaniialar toby birqatar aktivterdi básekeles ortaǵa shyǵarý úshin belsendi qyzmet atqarýda. Bul sharalar Kompaniianyń strategiialyq damýy men jekeshelendirýdiń memlekettik baǵdarlamasy aiasynda júrgizilýde.
Memleket basshysy men QR Úkimetiniń tapsyrmasyna orai, «QTJ» UK» AQ temirjol kompaniiasy kóliktik-logistikalyq holdingke ainaldy. Holdingtiń aldynda tranzittik áleýetti júzege asyra otyryp, Qazaqstannyń Jańa Jibek joly boiyndaǵy logistikalyq haby bolyp qalyptasýyna qyzmet etýde.
Q. Alpysbaevtyń aitýynsha, «qazirgi tańda QTJ kompaniialary tobynda maqsatty qurylymdyq toptar qurylýda. Olar beiindik aktivterdi shoǵyrlandyrý men kólik-logistikalyq biznes segmentin bir baǵytqa beiimdep, sonymen qatar beiindi emes qosymsha aktivterdi jekeshelendirý kózdeledi».
Jekeshelendirýge temirjol tehnikalary men qural jabdyqtaryn shyǵaratyn zaýyttar, júk jáne jolaýshylar tasymaldaý segmentindegi aktivter, kólik-logistikalyq terminaldar, qosalyq beiindi emes aktivter shyǵarylady.
Q. Alpysbaevtyń aitýynsha, (2014-2015) jekeshelendirýdiń birinshi kezeńinde 21 aktiv shyǵarylyp, odan 42,4 milliard teńge tústi. Kompaniianyń kóptegen enshiles kásiporyndary bastapqy baǵasynan joǵary somaǵa satyldy. Bul óz kezeginde jeke sektordyń QTJ aktivine degen suranysynyń joǵary ekendigin kórsetedi.
2016 jyly 11 aktiv jeke sektorǵa shyǵarylyp, 24 mlrd. teńgege baǵalandy. "Lokomotiv qurastyrý zaýyty» AQ 50% aktsiiasy Evolution seriiasyndaǵy lokomotivterdiń tehnologiiasynyń menshik iesi men negizgi jabdyqtar jinaǵyn jetkizýshi «General Electric» kompaniiasyna berildi.
2017 jyly QTJ kompaniialary tobynyń 21 aktivi shyǵarylady. Olardyń ishinde Aqtaý halyqaralyq teńiz saýda porty men «QTJ» UK» AQ senimdi basqarýyndaǵy birqatar óńirlik áýejailar básekeles ortaǵa shyǵarylady.
«Biz memlekettik jekeshelendirý baǵdarlamasyna qazaqstandyq jáne sheteldik investorlardyń belsendi qatysýyn kútemiz», - deidi Q. Alpysbaev. Bul árine óz kezeginde biznes ortadaǵy investitsiialyq ahýaldyń jaqsaryp, elimizde orta jáne shaǵyn biznestiń damýyna serpin beretindigine ol arqyly IJÓ ósetindigine senim bildirdi.
