Jambyl oblysynda apatqa ushyraǵan poiyzda zardap shekkenderge barlyq qajetti kómekter kórsetiledi. Bul týraly «Qazaqstan temir joly» UK» AQ Basqarma tóraǵasy Qanat Alpysbaev brifing barysynda málim etti, dep habarlaidy QazAqparat.
18 maýsymda Jambyl jol bólimshesiniń Shý stansasynda «Qazaqstan temir joly» UK AQ Basqarma tóraǵasy Qanat Alpysbaev, QR IDM Kólikterdi baqylaý komitetiniń tóraǵasy Áset Asaýbaev, № 9 «Astana-Almaty» jolaýshylar poiyzynyń joldan shyǵyp ketýine qatysty oqiǵa boiynsha jýrnalistermen brifing ótkizdi. Sondai-aq, brifingke Jambyl oblysy Tótenshe jaǵdailar departamentiniń ókilderi de qatysty.
«Qazaqstan temir joly» UK» AQ Basqarma tóraǵasy Qanat Alpysbaev zardap shekkenderdi qoldaýdyń barlyq múmkin sharalary jasalyp jatqandyǵyna toqtaldy.
Qazaqstan Respýblikasy zańnamasy bekitken tólemderden ózge, «Qazaqstan temir joly» ulttyq kompaniiasy qaiǵyly jaǵdai bolǵan otbasyna 2 millionnan astam teńge, zardap shekkenderge alǵan jaraqattarynyń densaýlyǵyna keltirgen zalalynyń aýyrlyǵyna bailanysty 500 myń teńgeden 1 million teńgege deiin beriledi.
Sondai-aq, jolaýshylar «Jolaýshylar tasymaly» AQ-nyń «NSK» saqtandyrý kompaniiasymen ótken jyly jasasqan kelisimshartyna orai tiisti ótemaqy ala alady. Saqtandyrý kompaniiasynyń qosymsha ótemaqy tóleý máselesi «QTJ» UK» AAQ-ynyń erekshe baqylaýynda tur.
Q. Alpysbaevtyń aitýynsha, «QTJ» UK» AQ janynan jedel shtab quryldy. Ol vagondardyń joldan shyǵyp ketýine qatysty barlyq zardaptardy joiýdyń sharalaryn úilestiredi.
Oqiǵa bolǵan jerde 9 ártúrli tehnika men 300-ge jýyq temirjolshy qalpyna keltirý jumystaryn júzege asyrýda. Poiyz qozǵalysy ekinshi jolmen júrgizilýde.
Arnaiy komissiia oqiǵanyń sebebin saraptaýda. Onyń nátijesi qosymsha habarlanady.
«Qazirgi kezde jol teliminiń infraqurylymy tehnikalyq tekserýden ótkizilýde. Jyljymaly quramnyń instrýmentarlyq ólshemi jasalýda. Saraptaý nátijesi zerdelenýde»,-deidi kompaniia basshysy.
«QTJ» UK» AQ qyzmettik tergeý amaldaryn júrgizýde. Soǵan orai oqiǵanyń sebebi saralanady. Temirjol telimi túgeldei lokomotivter men vagondardyń jaǵdaiy tekseriledi. Poiyz qozǵalysynyń qaýipsizdigine talap kúsheitildi.
«Bolǵan oqiǵaǵa qatysty Bas kólik prokýratýrasynyń qadaǵalaýymen quqyq qorǵaý organdary qylmystyq is qozǵady»,-delingen «Qazaqstan temir joly» UK» AQ baspasóz qyzmetiniń málimetterinde.
