Senat Tóraǵasy Qasym-Jomart Toqaev Astanadaǵy Qazaq ulttyq akademiialyq kitaphanasynda zańǵar jazýshy, Qazaqstannyń Eńbek Eri Ábish Kekilbaevtyń 80 jyldyǵy qarsańynda qalamger atyndaǵy oqý zalynyń ashylý saltanatyna qatysyp, sóz sóiledi.
«Halqymyzdyń mańdaiyna bitken zańǵar jazýshysy, Eńbek eri, kórnekti memleket jáne qoǵam qairatkeri, qazaq ádebietiniń klassigi Ábish Kekilbaevtyń Ulttyq kitaphanada arnaiy oqý zaly ashylyp otyr. Menińshe, bul Ábish aǵamyzdyń 80 jyldyǵy qarsańynda onyń esimin ulyqtaý jolyndaǵy alǵashqy qadamdardyń biri. Ult rýhaniiatyna ólsheýsiz úles qosqan tulǵanyń esimi, shyn máninde, halqymyzdyń eń joǵary qurmetine laiyq. Sondyqtan osyndai igi bastamalardyń ǵumyry uzaq bolary sózsiz. Jańa jyldan bastap bul jumysqa kirisýimiz kerek. Úkimet, tiisti ákimdikter qajetti josparlardy daiyndap, tiisti is sharalardy qolǵa alady dep oilaimyn. Bul búkil halyqqa kerek mańyzdy jumys» ,- dedi Q.Toqaev.
Ábish Kekilbaevtyń qaitalanbas qoltańbasy qazaq ádebietiniń ǵana emes, álem ádebietiniń qazynasyna ainalǵanyn aitqan Senat Tóraǵasy «Kósemsóz sheberiniń shyǵarmashylyǵy boiynsha tereń zertteýler júrgizý - keleshek býyn ǵalymdarynyń aldyndaǵy mańyzdy mindet bolýy tiis. Sebebi, Ábish Kekilbaevtyń oilary, filosofiiasy jáne jalpy rýhani álemi muhittai tereń. Ábish Kekilbaevtyń ádebi álemi sheksiz dúnie, kópqyrly, maǵynaly mura. Biliminiń kókjiegi sheksiz, biregei tulǵa, ári jazýshy, ári ádebiettanýshy, ǵalym, tarihshy, oishyl, filosof qana emes, memleketimizdiń damýyna eleýli eńbek sińirgen kórnekti memleket qairatkeri. Bul - uly jazýshylardyń arasynda óte sirek kezdesetin qubylys», - dep atap ótti.
Prezidenttiń senimdi serigi bolǵan Ábish Kekilbaevtyń týyndylarynyń ideialary «Rýhani jańǵyrý» filosofiiasynyń negizderimen úndesip jatqanyna erekshe nazar aýdarǵan Qasym-Jomart Toqaev «Prezidenttiń «Uly dalanyń jeti qyry» ideologiiasy, túptiń túbinde, qazaq ziialy qaýymynyń, jalpy halqymyzdyń asyl armanynyń kórinisi. Búginde bútin halqymyz ulttyq ideiany jańǵyrtý jolyna bet burdy. Osylaisha, Ábish aǵamyzdyń armany iske asýda», - dedi.
Senat Tóraǵasy Q. Toqaev óz sózin qorytyndylai kele, jinalǵan qaýymǵa «Marjansóz sheberi, gýmanist-ǵalym, ultjan-saiasatker Ábish Kekilbaevtyń shyǵarmashylyǵyn, onyń jalpy murasyn ósip kele jatqan urpaqtardyń arasynda keńinen dáripteý – bul bizdiń birinshi kezektegi maqsatymyz bolýy tiis. Osy baǵytta Kekilbaevtaný ádebiettaný ǵylymyndaǵy negizgi pánderdiń biri bolyp qalyptasýy qajet. Biz qoǵam retinde tiisti áreket jasap, bul jumysty baqylaýǵa alýymyz kerek», - degen oi tastady.
Senat Tóraǵasy kóterip otyrǵandai, ǵalymdar men ádebietshiler uly qalamgerdiń mol murasyn keler urpaqqa jetkizý jolyndaǵy jumystardy belsendi ári muqiiat júrgizse, Ábish Kekilbaiulynyń jarqyn beinesi halqymyzdyń jadynda máńgilik saqtala beretini kúmánsiz.
Ádilbek QABA
