Reseidiń Orlov oblysynda 137-shi atqyshtar diviziiasy jaýyngerleriniń súiekteri tabyldy. Olardyń ishinde Keńes odaǵynyń batyry Boran Nysanbaev ta bolýy múmkin, dep habarlaidy Reseidegi Qazaqstan elshiligi.
Resmi málimetke sáikes, jaýyngerlerdiń jatqan jerin byltyr bir áiel kórsetken. Eki kúnnen keiin ol kisi qaitys boldy. Reseilik izdeý tobynyń músheleri kórsetilgen jerde 160 adamnyń jatqanyn anyqtady. Al jeke zattardy zerdeleýdiń olardyń barlyǵy 137-shi atqyshtar diviziiasynyń jaýyngerleri ekenin kórsetti. Dál osy diviziiada KSRO batyry Boran Nysanbaev ta boldy.
Jergilikti tarihshy ári ólketanýshy Aleksandr Polynkinniń aitýynsha, 1960 jyly Pokrov aýdanynyń Ýst-Leski aýlynda (qazirgi ataýy - Leski) Boran Nysanbaevtyń belgisi ornatylǵan bolatyn. Al birshama ýaqyttan keiin Droskovoda batyrdyń eskertkishi boi kóterdi. Alaida Nysanbaev ol jerde jerlengen emes. Sebebi 137-shi atqyshtar diviziiasy Leski dep atalatyn múldem basqa jerde soǵysqan. Ol eki aýdannyń shekarasynda ornalasqan bolatyn.
Jańadan tabylǵan qabirdiń súiekterin genetikalyq saraptamadan ótkizý úshin biraz qarajat qajet. Onsyz sol jerde jatqan jaýyngerlerdiń kim ekenin anyqtaý múmkin emes.
Keńes odaǵynyń batyry, minometshiler raschetiniń komandiri Boran Nysanbaev 1918 jyly Atyraý oblysy, Inder aýdany, Kóktoǵai okrýgine qarasty Qańbaqty eldi mekeninde dúniege kelgen.1942 jyly 6 qańtarda Esbol aýdanynyń áskeri komissariaty arqyly áskerge shaqyrylyp, №137-atqyshtar diviziiasynyń №770-polkinde minometshi bolǵan. Ol Orel oblysy, Pokrovsk aýdany, Leski aýyly úshin bolǵan urysta jaýdyń atys uiasyn joiyp, sol jerde 1943 jyly 6 aqpanda erlikpen qaza tapqan.
Leski aýylyn jaýdan azat etkende Boran denesiniń janynda jaýdyń 28 jaýyngeriniń óli denesi jatypty. Ol maidan dalasynda Aleksandr Matrosovtan 17 kún buryn erlik jasap, jaý uiasyn keýdesimen jaýyp, beline bailanǵan granatalaryn dzot ishinde jaryp úlgergen. Sóitip, ózi qaza tapsa da dushpandaryn jer jastandyryp, shabýyldaýshy jaýyngerlerdiń jolyn ashqan. Jerlesimizge teńdesi joq erlik kórsetkeni úshin KSRO Joǵarǵy Keńes prezidiýmynyń 1943 jylǵy 23 qyrkúiektegi jarlyǵymen Keńes Odaǵynyń Batyry ataǵy berildi.
Reseidiń Orel oblysy Pokrov aýdanyndaǵy Verhnii Jernovets jáne Droskovo aýyldarynyń jurtshylyǵy ózderin qalyń jaýdyń ezgisinen bosatqan Boran Nysanbaevtyń esimin erekshe qadirleidi. Olar árbir mereke saiyn Droskovodaǵy mekteptiń aýlasynda turǵan jerlesimizdiń alyp eskertkishine taǵzym etip, gúl shoqtaryn qoiyp otyrady. Droskovolyqtar 13 aqpandy óz jeriniń, al, 14 aqpandy búkil Pokrov aýdanyn nemis basqynshylarynan azat etilgen kúni retinde atap ótýdi dástúrge ainaldyrǵan. Verhnii Jernovets aýylynda Boran Nysanbaev atyndaǵy mektep, al Leski aýylynda jerlengen jeri de bar.
